Koronavirusi ka krijuar një situatë alarmante në Ekuador, ku qytetarët detyrohen t’i lënë trupat e viktimave në trotuar me shpresën se dikush do t’i marrë.
Sipas Daily Mail, të paktën 150 kufoma mbetën në rrugë në qytetin Guayaquil në Ekuador, teksa zyrtarët përpiqen të përballojnë vdekjet nga koronavirusi në vend.
Mësohet se trupat e viktimave qëndrojnë në rrugë deri në 3 ditë, përpara se autoriteteve t’i jepet mundësia t’i largojnë nga aty.
Varfëria ekstreme e vendit ka bërë që disa nga familjarët e viktimave t’i mbulojnë viktimat me qese plastike, çarçafë ose të përdornin kuti kartoni si arkivole.
Pasi banorët shpërndanë foto dhe video të këtyre pamjeve në rrjetet sociale, nënkryetari i Ekuadorit, Otto Sonnenholzner kërkoi falje publike.
Javën e kaluar autoritetet mblodhën të paktën 150 kufoma, por nuk janë konfirmuar se sa prej tyre ishin viktima të koronavirusit.
Deri më tani në Ekuador janë shënuar 180 viktima, ndërsa janë regjistruar 3,646 raste infektimi.
