Sipas parashikimeve, Italisë do t’i duhet të jetojë me Covid-19 deri në muajin korrik. Ka disa ekspertë të cilët tregojnë se muaji maj do jetë vendimtari. E disa të tjerë janë dorëzuar tek vaksina, për të ndryshuar rrjedhën e jetës. Roberto Bernabei, anëtar i Komitetit Shkencor Teknologjik të urgjencës, ka thënë se kulmi i infeksioneve është arritur.
Ai deklaron se muaji maj është shumë herët për eliminimin e infeksioneve. Duke hedhur poshtë këto studime, Bernabei është i mendimit se deri në muajin korrik, Italia do duhet që të luftojë fort me koronavirusin.
“A do të thotë kjo se po i afrohemi uljes së dëshiruar, zero? Po, por nuk do të arrihet shpejt.
Nuk më duket realiste për mua të hedh hipotezën e një eliminimi të infeksioneve për mesin muajit maj, siç lexohet në disa studime.
Unë besoj se deri në korrik do të duhet të merremi me virusin”, është shprehur Roberto Bernabei, anëtar i Komitetit Shkencor Teknologjik të urgjencës.
Në konferencën për shtyp ai tha se Komiteti po punon për të kuptuar në cilat faza shënohet rihapja graduale.
“Kemi mbërritur 20 ditë nga fillimi i izolimit, kështu që do të jetë e rëndësishme të vlerësojmë të dhënat e reja që do të arrijnë në orët e ardhshme për të arritur në një parashikim më të detajuar”.
