Ferdinand Dervishi
“Ai ka në mes të gjoksit dy vrima tejshpuese plumbash pranë njëra-tjetrës. Ishin 2-3 centimetër larg njëra-tjetrës”.
Ky është pohimi që u ka bërë të dielën, 28 tetor, një nga ekspertët e policisë së Gjirokastrës, për disa nga gazetarët lokalë, pak kohë nga vdekja, në Bularat të Gjirokastrës, e minoritarit Kostandinos Kacifas. Askush nuk e ka vlerësuar, porse ky është një pohim flagrant, që shkencën e balistikës e çon vetëm në një përgjigje: Kostandinos Kacifas është vetvrarë!
Pse e rrëzon shkenca?
Nisur nga fakti që dy vrimat e plumbave janë në mes të gjoksit të të vdekurit, pyetja më minimale e një njohësi të balistikës do të ishte? Si ka mundësi që një pjesëtar i forcave RENEA të ketë qëlluar me kaq precision; dy predha në tre apo më pak centimetër larg njëra-tjetrës? Sa larg ishte speciali nga viktima?
Duke marrë të dhëna nga gazetarë dhe njerëz që kanë ndjekur nga afër operacionin e RENEA në Bularat të Gjirokastrës, thuhet se forcat speciale ishin vendosur, në rastin më të mirë 1 kilometër larg vendndodhjes së Kasifasit dhe, në rastin më oportun, 1200 metër larg. Për më tepër RENEA kishte disavantazh në goditjen e shënjestrës, pasi specialët ishin të pozicionuar poshtë, ndërkohë që Kacifas ishte vendosur në lartësinë e një shpati mali. Pra, një vendosje që vështirëson qitje perfekte nga poshtë – lart.
Pas këtyre të dhënave, një ekspert i balistikës do të përgjigjej në mënyrë kategorike: Nisur nga largësia e përfunduar te vështirësia, asnjë qitës në botë nuk arrin ta realizojë dy qitje kaq pranë njëra-tjetrës.
Atëherë çfarë është duke ndodhur? Përse po i lëmë autoritetet greke dhe grekët apo shqiptaro-grekët e tjerë të vazhdojnë të abuzojnë me këtë ngjarje?
Probleme nga një deklaratë e nxituar?
Duket të gjithë tymnajën lehtësisht të lexueshme e ka krijuar një deklaratë e nxituar e Drejtorit të Përgjithshëm të Policisë, Ardi Veliu, që thoshte tekstualisht:”…Forcat speciale janë pozicionuar për të mbrojtur jetën e tyre dhe nëpërmjet megafonit i kanë bërë thirrje të herëpashershme shtetasit që vijonte të qëllonte me armë që të dorëzohej dhe të hidhte armën e zjarrit. Shtetasi Kaçifa ka vijuar të qëllojë kundër forcave speciale për gati 30 minuta, duke rrezikuar seriozisht jetën e tyre. Në kundërpërgjigje, të forcave speciale gjatë shkëmbimit të zjarrit ka mbetur i vrarë shtetasi Kostandinos Kaçifa…”
Kësaj deklarate zyrtare, apo të dhënave të drejtpërdrejta nga Drejtori i Përgjithshëm, ju përmbajt edhe Kryeministri Edi Rama, kur pa të ndizeshin flakët e urrejtjes në shtetin fqinj, duke shkruajtur në një nga rrjetet sociale:
“Fqinj të dashur! Në vend ta quani të papranueshme humbjen e jetës së një të fandaksuri që qëlloi me plumba luftarakë mbi policinë tonë, e cila bëri vetëm detyrën e saj, bashkohuni me ne në falenderimin e Zotit që asnjë jetë e pafajshme nuk humbi sot nga marrëzia ekstremiste”.
Në këtë pikë pyetja që lind është: Mos vallë Drejtori i Përgjithshëm është nxituar të bëjë një deklaratë të gabuar që thoshte se Kacifas u vra nga RENEA? Mos vallë, të përfshirë nga euforia nacionaliste, ai dhe të tjerë, nuk kanë pritur të ketë një përgjigje nga ekspertët? Mos vallë, kjo deklaratë e nxituar, e mbështetur nga mesazhi i Kryeministrit, tashmë është vendosur keqas përballë fakteve të ekspertizave, duke i mbajtur ato larg, apo më keq, duke i censuruar?
Terri informativ dhe përgjegjësitë
Është fakt se sot, pas 4 ditësh nga ngjarja, ne kemi një terr informativ përsa i përket të dhënave për mënyrën e vdekjes së minoritarit Kostandinos Kacifas. Nuk kemi asnjë të dhënë nga ekspertët e policisë dhe mjekësia ligjore lokale e Gjirokastrës, nuk kemi asnjë të dhënë nga Policia e Shtetit apo Policia Shkencore, nuk kemi asnjë të dhënë nga Prokuroria.
Nga ana tjetër, kemi një kufomë me dy pamje.
1-Kufomë me pamje të freskët, pra, të sapovdekur, me dy plumba tejshpues në gjoks, fare pranë njëri-tjetrit, të fotografuar, të këqyrur, të përshkruar në raportin e policisë lokale dhe atë të mjekësisë ligjore të Gjirokastrës.
2-Kufomë me pamje jo reale, pasi aktualisht prej saj është e vështirë për të nxjerrë përfundime të sakta. Kjo sepse në pjesën e plagëve është bërë autopsia dhe më pas kjo pjesë është larë dhe qepur, duke humbur shumë nga elementët identifikues, por sigurisht jo të gjithë.
Në këtë pikë pikëpyetjet që ngrihen janë të shumta:
-A do të kemi në një kohë të afërt pamjet filmike të RENEA-s për aksionin?
-A do të bëhet publik raporti i policisë dhe mjekësisë ligjore të Gjirokastrës?
-A do të ketë një raport të Policisë Shkencore në Policinë e Shtetit?
-A do të kemi një raport final të Prokurorisë?
Dhe në rast se rezulton që Kostandinos Kacifas ka vrarë veten, kush do të mbajë përgjegjësi për mashtrimin e opinionit, përfshirë kryeministrin?
Kush do të mbajë përgjegjësi për situatën e tensionuar mes dy vendeve fqinje, bashkë me pasojat, të cilat nuk do të ekzistonin nëse policia shqiptare do të kishte zbardhur ngjarjen ashtu si e thonë ligjet e saj funksionale?
TIRANA TODAY
