Eksperti i kriminalistikës, Ervin Karamuço, ka ngritur shqetësimin për nivelet e përdorimit të lëndëve narkotike në vendin tonë. Karamuço ka deklaruar se ky fenomen është bërë shqetësues jo vetëm për të rinjtë, por edhe për administratën publike, pasi sipas tij është e prekur dhe duhet të testohet rregullisht. Profesori i kriminalistikës Ervin Karamuço i ftuar në studion e “ABC Live”, tregoi shifra alarmante mbi rritjen e kërkesës për përdorimin e drogërave të ndryshme në Shqipëri. Sipas tij kërkesa është rritur me rreth 40- 50 përqind, dhe të rrezikuarit kryesor janë shkollat, por edhe administrata publike shqiptare.
Sipas tij “është rritur shumë numri i përdoruesve që arrestohen, nga 17 deri në 21 vjeç”, sepse sipas tij, ata nuk e projektojnë veten për të qenë shpërndarës, por ngelen debitorë.
Për ekspertin e kriminalistikës, “në jug të Shqipërisë, një kryetar Bashkie në jug të Shqipërisë, përdor drogë, kokainë, ka krijuar shqetësime emocionale të personalitetit, të cilat janë verifikuar dhe nga vartësit e tij, prandaj duhet që patjetër të merren masa për administratën shtetërore, rojet, sinjalizuesit publikë duhet ti kemi edhe për këtë aspekt. Jemi përplasur fort, me struktura të veçanta të Policisë së Shtetit, por nuk dimë se çfarë bëhet me administratën tjetër shtetërore atë civile”, tha Karamuço.
