Ekspertët indianë besojnë se kanë zbuluar shkakun “e sëmundjes misterioze”, që i ka marrë jetën një personi dhe mbi 400 tjerë i detyroi të kërkojnë ndihmë nëpër spitale.
Kaosi filloi të dielën në qytetin Eluru, kur nëpër spitale filluan të arrijnë dhjetëra pacientë me simptoma të ndryshme. Shumë prej tyre kishin përjetuar sulme epileptike, të vjella dhe kishte persona që kishin humbur vetëdijen.
Autoritetet menjëherë dërguan ekipet e ekspertëve në qytet për të konstatuar se për çfarë bëhet fjalë, dhe në fund doli se nuk bëhet fjalë për kontaminim të ujit.
Pas testeve shtesë, besohet se nuk bëhet fjalë për ndonjë sëmundje. Siç raportojnë mediat lokale, rezultatet preliminare tregojnë se ka ardhur deri te helmimi masiv me kimikale që janë gjetur në pesticide, përkatësisht në sprajin e përdorur në luftimin e eliminimin e mushkonjave.
Përveç kontrollit të ujit të pijshëm, ekspertët po i bëjnë analiza edhe qumështit. Mediat e atjeshme raportojnë se mjekët kanë arritur t’ia stabilizojnë gjendjen shëndetësore të pacientëve.
