Përveç drejtuesve të automjeteve, këmbësorët vijojnë të mbeten burim aksidenti në vendin tonë. Shumica e qytetarëve nuk kalojnë tek vijat e bardha, por e ndërpresin rrugën.
Propozimet për ndryshime të kodit rrugor që ashpërson masat për kundravajtësit, për ekspertët e sigurisë rrugore janë pozitive. Por ata ngrenë sërish shqetësimin për hapësirat ligjore që ka kodi rrugor për këmbësorët.
“Ne kemi shumë këmbësorë që humbasin jetën, pra duhet të vendoset një disiplinë e fortë midis këmbësorit dhe rrugës. Ne nuk kemi të klasifikuar rrugët. Ripunimi i kodit rrugor duhet bërë rresht për rresht dhe jo i cunguar. Për shembull në kodin rrugor thuhet që duhet të kalojnë në vendkalimet e këmbësore, nënkalime, mbikalime dhe kur vijat e këmbësorit janë më shumë se 100 m larg, atëherë këmbësori e ndërpret rrugën”, shprehet Gëzim Hoxha, eksperti i sigurisë rrugore.
Burime pranë policisë rrugore bëjnë me dije se deri tani gjobat për këmbësoret nuk janë vjelë masivisht pasi nuk funksionon sistemi i adresarit. Por ekspertët propozojnë mënyrat se si mund të gjobitet kalimtari i cili nuk respekton rregullat e qarkullimit rrugor.
“Të gjithë njerëzit kanë vendbanimin e tyre, kanë adresa të saktë. Ka një variant tjetër që këto gjoba të vilen, qytetari mund të ndalohet, këmbësor dhe t’i hiqen pikë nga patentat. Ndërprerja e rrugës është përgjegjësi e këmbësorit, merret me kartë identiteti, çohet në komisariat dhe i pritet fleta e gjobës dhe ngelet debitor”.
Sipas INSTAT aksidentet rrugore, në 79,6 % të rasteve, kanë ndodhur si pasojë e sjelljes së drejtuesit të mjetit, dhe afro 80 % të rasteve nga këmbësorët. Tirana mban numrin më të lartë të aksidenteve rrugore. /Tv Klan
