Mes debateve të forta është duke u zhvilluar diskutimi për Teatrin Kombëtar. Edhe pse opozita e quan ligjin antikushtetues, ditën e enjte pritet të miratohet varianti i ri i ligjit për Teatrin. Duke hapur kësisoj edhe garën për firmën ndërtuese. Kryetari i Bashkisë Erion Veliaj shprehet se ndërtimi i Teatrit të ri është fakt, pavarësisht sabotimeve nga opozita apo artistët që e kundërshtojnë.
“Debati i sotëm i Teatrit nuk është për llaç e tulla. Sepse për llaç e tulla, në mos për një projekt do biem për tjetrin. Artin nuk e bëjnë llaçi dhe tulla, e bëjnë aktorët që janë në skenë. Absolutisht që fjala e artistëve ka peshë. Kjo është edhe arsyeja përse patëm diskutime me të gjithë artistët për të kuptuar se cila është ndjesia e tyre. Duhet të vazhdojmë në tallash apo ndoshta ka ardhur koha për të bërë diçka tjetër.
Sfida nuk është a do të prishet e vjetra, sfida është nëse do të ndërtohet e reja. Sigurisht që e reja do të ndërtohet. Ligji është tashmë në Parlament, po kalon disa amendime që mund t’i lërë mundësi edhe kujtdo tjetër që mund të ketë edhe një ofertë më të mirë, sesa zhvilluesi që është edhe pronari i tokës aty. Por, teatri i ri do të bëhet.
Realisht është mëkat që ne kemi një ndërtesë tallashi, ku nuk i kthejmë dot kolosët e teatrit. Ndaj ligji që kalon këtë të enjte na hap dritën jeshile. E reja të imponohet, ti mund ta vonosh, mund ta pengosh apo sabotosh, por nuk e shmang dot. Dhe unë besoj se ajo që po na ndodh me teatrin, do e kthejë në pikë reference Tiranën.
99% e artistëve e kanë pranuar këtë gjë dhe me padurim e presin teatrin e ri. Edhe për hudhër e për sy të keq është më mirë që 1 apo dy veta janë kundër.” Tirana Today
