Ekonomisti Klodian Muço ka hedhur kritika ndaj kryeministrit Edi Rama, për të cilin tha se nuk është në dijeni të halleve që ndeshen qytetarët shqiptarë.
I ftuar këtë mbrëmje në emisionin “Ekopolitikë”, Muço e konsideroi mënyrën se si qeveriset vendi një katastrofë. Sipas tij, Shqipëria do të pësojë regres nëse nuk vepron me synim për të ngritur ekonominë e vendit.
“U bënë disa vite që kryeministri Edi Rama është në krye të qeverisë. Gjëja më e thjeshtë është të dëgjojë fjalët tona, të shkojë të takojë biznesin e vogël, ato familjarët e punësuar në bizneset e vogla nga 16-18 orë në ditë me fëmijët aty mëngjes, drekë, darkë. Të shohë sa të ardhura ka çuar në familje. Të jeni të bindur se me aq sa kam vizituar, aq sa kam parë në këtë vend që jetojmë, është se ne jemi në një qeverisje katastrofë.
Ne kemi një kryeministër që nuk e di kush janë qytetarët dhe çfarë hallesh kanë, nuk shoh shpresë, duhet një përmbysje e madhe, duhen politika, horizonte të reja, duhet të dinë se ku do shkojmë përndryshe 2020 do jetë si 2018, 2019 më keq siç po del. Ajo që kam kuptuar dhe e them me plot gojë se ka bërë, të largohet të vijë dikush tjetër, se bën dikush tjetër, të largohet edhe ai, të vijë tjetri. Të nxjerrim mësime nga ato që janë bërë”, deklaroi Klodian Muço.
