Kryeministri Edi Rama ka publikuar një tjetër grafik në Facebook, ku tregohet raporti i vdekjeve nga koronavirusi për 1 milionë banorë.
Kreu i qeverisë thekson se marrja e masave shtrënguese ka qenë vendimtare, që raporti në Shqipëri të mos ishte më i rëndë.
Rama thotë se plani i vendosur nga qeveria do të vijojë të zbatohet, teksa shton se edhe ekspertët këshillojnë për të mos ulur vigjilencën.
Sa i takon ekonomisë, kryeministri tha se ajo mund të ngrihet sërish, ndërsa “të vdekurit nuk ngjallen më”.
Postimi i plotë:
? VDEKJET PËR 1 MILIONË BANORË tregojnë qartë se sa vendimtare kanë qenë shpejtësia, rreptësia dhe respektimi masivisht i masave në Shqipëri?
? Të gjithë ekspertët kudo në botë, bëjnë thirrje për të mos e ulur vigjilencën dhe asnjë qeveri në botë, nuk ka një plan hapjeje pa shkallë, në varësi të kurbës!
? Ne do të vazhdojmë të zbatojmë planin tonë dhe ta adaptojmë atë sipas dinamikës së zhvillimeve në frontin e luftës për mbrojtjen e jetës. Ekonomia bie e ngrihet prapë, të vdekurit nuk ngjallen më, prandaj të gjithë duhet ta kenë të qartë që ne nuk do të tërhiqemi nën asnjë presion të padijes, mendjelehtësisë e vulgaritetit, të atyre që nuk duan të kuptojnë thelbin e kësaj situate dhe flasin për diktaturë e për lloj – lloj fantazish jashtë këtij realiteti!
