Ditën e sotme, grupeve të punës që po merren me verifikimin e dëmeve të shkaktuara nga tërmeti i janë bashkuar edhe 40 inxhinierë e arkitektë nga Kosova. Ata do të jenë në terren sëbashku me ekipin shqiptar për kontrollon teknik të çdo ndërtese.
Ekipi kosovar i inxhineirëve dhe arkitektëve është pritur nga Ministrja e Infrastrukturës dhe Energjisë, Belinda Balluku. Gjatë takimit me ta, Balluku identifikoi si emergjente identifikimin e ndërtesave, tashmë gati për t’u shembur. Më pas do të vijohet me të gjitha ndërtesat e tjera, duke nisur nga ndërtesat më sensitive, shkollat, spitalet dhe ndërtesat e tjera komunitare e më pas pas duke kaluar te banesat.
“Duam t’i ndajmë në kategoritë e ndërtesave që janë të qëndrueshme, ndërtesa që kërkojnë rikonstruksion dhe ndërtesa që duhen hedhur pasi përbëjnë rrezik publik dhe ne kemi disa të tilla”, u shpreh Balluku.
Në emër të qeverisë shqiptare Balluku falenderoi ekipin kosova dhe i informoi me situatën në terren për zonat e prekura.
“Ne kemi nisur nga Durrësi, Thumana e Laçi, por kemi edhe zona të tjera si Tirana e Kavaja ku rrezja e goditjes ka qenë më e lehtë, por me problematika si Tirana”, vuri në dukje ministrja.
Ministrja Balluku kërkoi nga ekspertët që krahas punës së tyre, ekipi të ndërgjegjësojë edhe banorët e prekur nga tërmeti për gjëndjen e banesave të tyre.
“Detyra juaj është sublime në këto momente jo vetëm për identifikimin e problematikës që kemi por sepse njerëzit kanë nevojë për mbështetje. Ka kaos të madh në rrugë e njerëzit janë të shqetësuar. Edhe atyre që nuk u janë dëmtuar banesat kërkojnë të dinë mbi situatën, sepse kanë parë fqinjët e tyre nën rrënoja. Inxhinierët gjatë komunikimit me to duhet t’u thonë të vërtetën që nëse banesa e tyre është dëmtuar nuk duhet të shkelin në atë ndërtesë edhe nëse kanë pronën e tyre, sendet e tyre kujtimet e tyre Brenda. Po ashtu duhet tu thonë edhe për rastet kur ka siguri që të kthehen në banesat e tyre dhe ata nuk kanë më nevojë të rrinë në rrugë, megjithëse qeveria i ka siguruar të gjithë”, deklaroi Balluku.
