Një ngjarje e rëndë është regjistruar në orët e para pas mesnate në Fier, teksa një punonjës policie humbi kontrollin e makinës duke përfunduar në oborrin e një shtëpie. Kjo ka bërë që pronari i shtëpisë të konfliktohej me policin i cili ishte në gjendje të dehur, duke bërë që ky i fundit ta qëllojë me armë zjarri të zotin e shtëpisë.
Në lidhje me këtë ngjarje ka reaguar edhe Policia e Fierit, e cila sqaron se polici 41-vjeçar, Paulin Shpani është një efektiv i Forcave të Ndërhyrjes së Shpejtë.
Ngjarja ka ndodhur në lagjen “Sheq i Madh” të Fierit, ndërsa ka mbetur i plagosur shtetasi 70-vjeçar Soni Meço.
Njoftimi i policisë:
Në orët e para të mëngjesit të sotëm, shtetasi P. Sh, 41 vjeç, banues në Tiranë, me detyrë punonjës policie në repartin e FNSH Fier, duke drejtuar në gjendje të dehur automjetin tip ‘Benz’, në lagjen ‘Sheq i Madh’, ka humbur kontrollin, ka dalë nga rruga dhe është futur në oborrin e banesës së shtetasit S.M., 70 vjeç.
Pasi është konfliktuar me pronarin e shtëpisë, ka nxjerrë armën dhe e ka plagosur në gishtin e dorës shtetasin S.M, i cili është jashtë rrezikut për jetën.
Është shoqëruar në Drejtorinë Vendore të Policisë Fier shtetasi P.Sh. dhe po kryhen nga SHÇBA veprimet procedurale dhe hetimore për zbardhjen e plotë të ngjarjes.
