Trajneri i ri i Kombëtares do të jetë Edi Reja. Ai do të shoqërohet nga Armand Duka në konferencën e lajmëruar për mediat në orën 15:00. Reja, me një CV të pasur në Itali, do të zëvendësojë në stolin e kombëtares sonë, Christian Panucci.
Ai është përzgjedhur nga një mori emrash që qarkulluan si pasardhës të Panuccit. Në karrierën e tij të pasur, Reja nuk kishte drejtuar kurrë më parë një përfaqësuese, gjithashtu ky ishte një detaj të cilin Reja e vlerësoi shumë, të nisije një aventurë të re në këtë pikë të karrierës së tij nuk ishte e lehtë. Ajo që të bën përshtypje në këto negociata ka të bëjë me ofertën e parë të FSHF-ës. Armand Duka i ofrojë ish trajnerit të Napolit, Lazios etj, një kontratë 2 vjeçare, por Reja e refuzoi këtë duke pranuar të jetë në “provë” deri fund të këtij viti, një periudhë e mjaftueshme që të dy palët të kuptojnë nëse do të vazhdojnë edhe më tej. Pra kualifikueset “Euro2020” janë një provë për Edy Rejan, nëse rezultatet janë të kënaqshme, të dy palët mund të rinovojnë qetësisht kontratën.
Italiani ka zgjedhur dhe stafin e tij, Alesando Calori do të jetë ndihmësi i tij. Ndryshe nga Panucci, Reja pritet të përfitojë 25 mijë euro në muaj, këtu nuk përfshihet paga për pjesën tjetër të stafit të tij. Gjithashtu në rast kualifikimi për në Europian do të këtë dhe një premio prej 200 mijë euro.
Edy Reja është një emër i njohur në futbollin italian. I lindur në vitin 1945, trajneri 73-vjeçar ka drejtuar një sërë skuadrash në Serie A, por edhe në Kroaci. Periudhën më të gjatë të qëndrimit në pankinë, Reja e ka kaluar pikërisht te Napoli në vitet 2005-2009, teksa e ndihmoi këtë skuadër të ngjitet nga Serie C1 në Serie A.
Pas aventurës te Napoli, Reja drejtoi Hajduk Split, ku qëndroi për një sezon, për t’u kthyer sërish në Itali nën drejtimin e Lazios, e më pas të Atalantës, që ishte edhe skuadra e fundit e tij.
