Rasti i përdhunimit të një të mitureje nga pesë persona në grup, solli revoltën e shqiptarëve. Rrjetet sociale patën një ndërgjegjësim në masë, ndërsa kërkuan ndëshkimin maksimal të tyre.
Pas këtij rasti, për fat të keq të përsëritur shpesh gjatë ditëve në fundit në vend, menjëherë qytetarët kërkuan të mblidheshin e të protestonin. 15-vjeçarja u përdhunua për muaj me radhë nga 5 persona në Rrëshen.
Qindra gra dhe vajza kanë marshuar ditën e sotme në Peshkopi, në mbështetje të 15 vjeçares e cila ra pre e përdhunimit nga 5 persona në Rrëshen.
Ato u mblodhën në bulevardin kryesor të qytetit, nga ku kërkuan mbështetje për të miturën, si dhe ngritje zëri për të parandaluar raste të tilla të rënda.
Gratë dhe vajzat mbanin në duar pankarta të tilla si: “Përdhunimi është krim”, “Edukoni djemtë”, “Ti nuk je vetëm”, etj.
Kjo është protesta e dytë, në mbështetje të 15 vjeçares së përdhunuar. Një ditë më parë, u protestua në Rrëshen. “Përdhunimi është krim”, ishte motoja e gjithë marshimit i cili u iniciua pas skandalit të përdhunimit të 15-vjeçares.
