Anëtarja e kryesisë së PD-së, Edith Harxhi, ka dorëzuar në gjykatë padi për ish-kreun e demokratëve Lulzim Bashën.
Harxhi ka deklaruar sot se ka kërkuar në gjykatë ndryshimin e objekt-padisë, për çregjistrimin e Lulzim Bashës nga regjistri i partive politike të gjykatës si kreu i PD-së.
“Sapo kam mbaruar një nga seancat gjyqësore në Gjykatën e Tiranës, për çështjen e padisë që i kam drejtuar gjykatës më 30 qershor të 2021, për pavlefshmërinë absolute të zgjedhjeve të PD-së për kryetar partie në 13 qershor të 2021.
Deri sot nuk ka pasur ende një seancë normale, dhe sot ishte seanca paraprake dhe unë kërkova ndryshimin e objekt-padisë, pikërisht çregjistrimin e Lulzim Bashës nga regjistri i partive politike të gjykatës si kreu i PD-së, duke qenë se është fat që Basha ka kërkuar dorëheqjen. Kjo u pranua nga gjyqtari, dhe seanca gjyqësore do vijojë më tej”, u shpreh ajo.
