Gazetari investigativ, Artan Hoxha, ka folur në lidhje me trafikimin e klandestinëve në Britaninë e Madhe, duke pranuar se edhe ai në të shkuarën ka emigruar ilegalisht.
I ftuar në emisionin ‘Repolitix’ në Report Tv, gazetari e cilësoi trafikimin e klandestinëve si një problem serioz, teksa shton se edhe pagesat për të shkuar në Angli, tashmë janë rritur.
“Shqiptarët në këto 30 vite, duke më përfshirë edhe mua ilegalisht kam ikur për shkak të kushteve të jetesës, varfërisë, për një të ardhme më të mirë. Kuksianët fillimisht përdornin dokumente të ish-Jugosllavisë.
Ky lloj trafiku organizohet kështu, nëse ke ndërmend të ikësh nuk lodhesh fare, pasi janë si agjencitë turistike, ‘Travel’ por nuk e shënojnë, por dihet se kush çon njerëz në Londër. Trafiku i klandestinëve ndërthuret me atë të narkotikëve, pasi më pas për të shlyer shumën që paguajnë 15 apo 17 mijë paund për të shkuar, atje punojnë në plantacionet me kanabis me llampa brenda banesave. Ata i fusin në kamionë të mbyllur, pasi nuk ka rrugë tjetër”, deklaroi Hoxha.
Kujtojmë se vetëm pak ditë më parë, 39 emigrantë humbën jetën brenda një kamioni. Refugjatët të cilët ishin nisur nga Bullgaria udhëtuan me orë të tëra, në temperaturat ngrirëse -25o.
