Dy persona të infektuar me koronavirus janë vetëvrarë tek spitali ‘Shefqet Ndroqi’. Lidhur me këto dy raste të rënda, PD ka reaguar përmes ish-deputetit Bardh Spahia. Ai thotë se dje u shënua rasti i dytë në më pak se tre javë, dhe kjo duhet të sjellë një impenjim serioz të autoriteteve dhe një plan konkret për të trajtuar.
Spahia ka shënjestruar drejtorin e spitalit dhe Ministrinë e Shëndetësisë, për te menduar për situatën e pacientëve. Po kështu të merrnin masat përkatëse për të trajtuar anën psikologjike të pacientëve.
Fatkeqësisht, asnjë nga dy spitalet Covid nuk ka psikolog. Më 13 gusht, nga kati i tretë i këtij spitali u hodh Xhino Koça, 29-vjeçari nga Durrësi, i cili për pak ditë do të kthehej në shtëpi për shkak se gjendja e tij po stabilizohej. Dje, Hasan Mira vjehrri i deputetit Gjetan Gjetani, u hodh nga kati i katërt i këtij spitali, duke i dhënë fund jetës.
Statusi
EDHE SA PACIENTE ME COVID-19 DUHET TE VETVRITEN QE QEVERIA TE REAGOJE?
Ende nuk ka një reagim nga spitali “Shefqet Ndroqi“ për 65 vjecarin me Covid-19, që i dha fund jetës duke u hedhur nga kati i katërt i spitalit! Rasti i dytë në më pak se tre javë, duhet të sjellë një impenjim serioz të autoriteteve dhe një plan konkret për të trajtuar, edhe një rëndim të gjendjes psikologjike për shkak të izolimit e vështirësisë së sëmundjes! Me probleme paraprake apo jo, fakt është që një 29 vjecar dhe një 65 vjecar zgjodhën t’i japin fund jetës, në vend të kurimit mjekësor!
Drejtori i spitalit e ministria e shëndetësisë duhet të mendonin për situatën e pacientëve dhe të merrnin masat përkatëse për të trajtuar anën psikologjike të pacientëve! Asnjëri nga dy spitalet Covid nuk ka psikolog!
Kjo situatë nuk mund të anashkalohet me justifikimin, se pacientët që i dhanë fund jetës kishin probleme paraprakisht! Kujdesi për shëndetin mendor ndaj pacientëve të tillë ka munguar krejtësisht!
Edhe sa pacientë me Covid-19 duhet të humbin jetën që qeveria të reagojë duke marrë masa konkrete?
