Nga Mentor Kikia
Këto punët e nacionalizmës janë shumë delikate këtu në Shqipëri. Për flamur e për atdhe, kur shkruajmë e flasim, ne të marrim gjak në vetull. Një pjesë e lexuesve, këtu dhe në disa media online, kishin reaguar ashpër që unë, në një shkrim për zgjedhjet në Mal të Zi, nuk e kisha sharë Dritanin me mbiemër me “viç” nga pas, që ia çoi qeverinë opozitës pro-serbe në Mal të Zi dhe jo Milos pro-perëndimor.
Sa për sqarim:
Nuk kam asnjë admirim për Milon që ka 30 vjet që drejton, herë në presidecnë e herë në kryeministri. Dhe largimi i tij është një lajm i mirë.
Nuk kam asnjë simpati e as antipati për këtë Dritanin.
Për ata që janë shqetësuar se ai, në një copë televizion paska thënë se Skënderbeu i ka patur prindërit serbë, mos u shqetësoni. Historia e Skëndërbeut është shkruar me kohë, nga historianë europianë e botërore, nuk ngeli ta shkruajë Dritani në atë TV-në një dhomë e kuzhinë, sot.
Për ata që janë të shqetësuar se kjo partia pro-serbe me të cilën ka bërë koalicion Dritani, paska thënë se do të tërheqë njohjen e Kosovës, mos u shqetësoni sërish, pasi Kosovën pritet ta njohë edhe vetë Serbia, e nuk do ta zhbëjë partia me 4 deputetë e Dritanoviçit.
Për ata që mendojnë se qeveria e re do ta largojë Malin e Zi nga NATO, sërish mos u hyni halleve kaq të mëdha. Nëse një qeveri malazeze do të dojë të largojë vendin nga NATO për llogari të Rusisë, ju siguroj se brenda natës lind një opozitë e re atje dhe të nesërmen qeveria jep dorëheqjen. Janë punë shumë më të mëdha se Dritani me 4 deputetë këto.
Dhe e fundit:
Mos e matni patriotizmin me kush shan më shumë deklaratat e Dritanit për Skënderbeun e Kosovën. Jemi në kohën kur kemi nevojë për ca patriotë të një lloji tjetër. Kemi nevojë për patriotë që të duan më shumë Shqipërinë, që punojnë me ndërshmëri për Shqipërinë, për patriotë që nuk e shikojnë Shqipërinë si plaçkë për ta vjedhur e pasuruar, por si një vend të cilit i detyrohemi natë e ditë.
