Gazetari Andi Bushati ka folur rreth krizës politike dhe në lidhje me zgjedhjet që do mbahen më 30 qershor.
Bushati, i ftuar në rubrikën “Opinion” në News24, tha se presidenti Meta duhet të japë dorëheqjen nëse zgjedhjet zhvillohen, duke ironizuar se edhe presidenti turk Erdogan do ta kishte zili këtë lloj qeverisjeje.
“Presidenti ka dy rrugë: ose të dalë me nder nga kjo situatë, ose të mbetet një kukull në dorë të qeverisë. Ky është një shtet, të cilin sot edhe Erdoganin do ta kishte zili pasi vepron vertikalisht”, u shpreh Bushati.
Më tej, ai thekson se 30 qershori është një vijë ndarëse mes demokracisë dhe regjimit dhe se të gjithë njerëzit duhet të ndërgjegjësohen sa i përket kësaj.
Deklarata e plotë:
“Datën e zgjedhjeve nuk e vendos një ambasador, por e vendos Presidenti i Republikës. Mbështetjen e ndërkombëtare, qeveritë shqiptare e kanë pasur edhe kur kanë patur Sorosin kundër. E para e punës unë mendoj se nëse Rilindja zhvillon zgjedhje, presidenti duhet të japë dorëheqjen. Presidenti ka dy rrugë: ose të dalë me nder nga kjo situatë, ose të mbetet një kukull në dorë të qeverisë. Ky është një shtet, të cilin sot edhe Erdoganin do ta kishte zili pasi vepron vertikalisht. Opozita ka bërë një gabim të madh, që kur dogji mandatin, ka përkundër në mëndje të njerëzve se kjo do të jepte një zgjidhje shumë të shpejtë. Nuk ka regjime që bien me dekrete presidenciale. Kjo është një betejë e gjatë për të kuptuar se njerëzit të ndërgjegjësohen se jemi përballë një regjimi. 30 qershori është një vijë ndarëse mes demokracisë dhe regjimit. Ata janë aq të fortë , sepse ata të mbytin që në vatër. Nuk mund të zihet një luan me një shpend të vogël.Gjëja më e mirë që mund të bëj opozita janë fotografitë, kamerat, celularët para çdo qendre votimesh, që të identifikojë sa po hyjnë dhe sa nuk po hyjnë. Gjithmonë për t’u fokusuar tek pjesëmarrje”.
