Rektori i Universitetit të Tiranës, Mynyr Koni ka shkaktuar përplasje mes Presidencës dhe qeverisë, konkretisht Ministrisë së Arsimit, Sportit dhe Rinisë.
Ministrja Shahini iu përgjigj sot vendimit të presidentit Meta për rrëzimin e kërkesës për shkarkimin e Konit, duke shprehur zhgënjim e keqardhje.
Nuk ka vonuar as reagimi i Presidencës, teksa menjëherë ka ardhur një përgjigje nga zëdhënësi i Metës, Tedi Blushi, i cili sugjeron ministrinë që të lërë retorikat boshe dhe të ndjekë procedurën që dikton ligji.
“Institucionet e Arsimit të Lartë janë autonome dhe askush nuk duhet të guxojë të prekë pavarësinë e tyre”, përfundon reagimi i Blushit.
Reagim i zëdhënësit të Presidentit të Republikës, Tedi Blushi:
Presidenti i Republikës, Sh.T.Z Ilir Meta në dekretin e tij për rrëzimin e propozimit për shkarkimin e rektorit të Universitetit të Tiranës, z.Mynyr Koni ka folur me argumenta ligjorë më gjatë se kurdoherë tjetër.
Ministria e Arsimit duhet të mbajë përgjegjësinë e saj të plotë për zbatimin e Reformës në Arsimin e Lartë dhe nëse nuk është dakord me argumentat ligjorë të bëra publike nga Presidenti, të ndjekë procedurën që dikton ligji, përtej retorikave boshe.
Institucionet e Arsimit të Lartë janë autonome dhe askush nuk duhet të guxojë të prekë pavarësinë e tyre.
