Nga Anxhela Ferra
Data 24 janar shënon edhe 100-vjetorin e ndarjes së Ismail Qemalit. Figura e nderuar shqiptare e cila shpalli Pavarësinë e vendit dhe ngriti flamurin në Vlorë në 1912. Menjëherë pas shpalljes së pavarësisë, Asambleja e Vlorës formoi Qeverinë e parë të Shqipërisë së Pavarur të drejtuar nga Ismail Qemali.
Tirana Today pyeti sot qytetarët nëse ata e dinë se cili ka qenë kryeministri i parë i Shqipërisë apo jo. Por, teksa një pjesë e pakët dhanë përgjigjen e saktë; pjesa më e madhe veçanërisht të rinjtë nuk e dinë se kryeministri i parë i vendit ka qenë Ismail Qemali.
“Po Enver Hoxha më duket se ka qenë kryeministri i parë i Shqipërisë. Mos ishte Ahmet Zogu apo Beqir Balluku?”
“Kryeministri i parë i vendit ka qenë Sali Berisha.”
“Enveri e ka filluar. Ai ka qenë i pari kryeminisitër.”
“Sot është dita e Ismail Qemalit, ndaj dhe ai ka qenë kryeministri i parë i Shqipërisë.”
“Kryeministri i parë i vendit ka qenë Aleksandër Meksi.”
Edhe pse janë të zhgënjyer nga politika, duket se përsëri se pjesa dërrmuese e shqiptarëve nuk ndahen nga pëlqimi i politikanëve të periudhës pas tranzicionit. Ku midis 45 kryeministrave që kanë qeverisur vendin tonë, përsëri emrat më të lakuar janë Sali Berisha dhe Edi Rama.
“Ka qenë Ahmet Zogu kryeministri i parë i Shqipërisë. Por, më i miri është Edi Rama. Për shumë arsye, është tirans, ka qenë sportist. Çun pazari, çun “Brodueji”, lloj-lloj gjërash ka bërë siç i ka dashur qejfi. Ça doni më?!
“Nga të gjithë kryeministrat e vendit më i miri ka qenë Sali Berisha. Ka pasur gjithmonë më shumë integritet.”
“Ismail Qemali ka qenë kryeministri më i mirë i Shqipërisë. Të tjerët që nga Ahmet Zogu e deri këta sot, bashkë me Enverin njëlloj janë.”/ TIRANA TODAY
