Ish-ministri i PD-së, Arben Imami, thotë se sipas informacioneve të tij, Basha e dinte për përgjimet e Dibrës dhe blerjen e votave që në vitin 2017, para marrëveshjes së 17 majit.
Imami ka bërë deklarata të forta, duke thënë se Basha e dinte dhe për dosjen e Durrësit ku përfshihet Vangjush Dako. Ai nuk e ka lënë me kaq, por ka thënë se kryedemokrati Basha jo vetëm që ka qenë në dijeni, por e ka pasur atë të zbardhur. Këto informacione, Imami tha se i ka marë para 1 viti e gjysmë, në kohën kur përkon me shkëputjen e marrëdhënieve me kreun e PD-së.
“Për informacionin që unë kam, Basha ka qenë në dijeni për përgjimet dhe blerjen e votave që në 2017, para marrëveshjes së 17 majit. Edhe dosjen e Durrësit, Basha e ka pasur të zbardhur…
Unë i kam mësuar këto informacione para 1 viti e gjysmë, kur shkëputa lidhjet. Di që e ka thënë te çadra; kam një dosje. Kur e mori ‘një person’ në telefon, tha e kam humbur”, tha më tej ai.
