Pas shoqërimeve të disa protestuesve në polici, ish-deputeti i Partisë Demokratike, Ervin Salianji deklaroi se banorët e “Unazës së Re” nuk kanë thyer asnjë ligj.
Në një intervistë dhënë për “Ora News”, Salianji u shpreh se gjithçka bëhet nga Edi Rama, me qëllimin e vetëm për të tërhequr vëmendjen nga problemet reale, ndërsa shtoi që kryeministri e sheh “Unazën e Re si thes me para që mezi pret t’i marrë”.
“Ne jemi në fazën e parë duke çuar përfaqësues ligjor, avokatë që interesohen për gjendjen e të shoqëruarve ndaj të cilëve nuk ka asnjë akuzë për momentin. Nuk ka thyerje ligji.
Është banalitet i Ramës për të tërhequr vëmendjen dhe shoqëron qytetarët për të bërë presion për atë që do ndodhë më vonë. Rama e ka bërë ritenderimin e Unazës së Re dhe do të marrë para me oligarkët e vet. E sheh si një thes me para, si një mundësi, të cilit i bëjnë sytë xixa për ti marrë dhe i shikon qytetarët si armiq. Nuk shikon asgjë tjetër.
Ne sot jemi në protestë të organizuar nga opozita por në mbështetje të qytetarëve dhe banorëve.
Kjo nuk është një strategji të PD për të ardhur këtu por me një gomarllëk të qeverisë që tenton të heqë vëmendjen nga ngjarjet reale”, theksoi ish-deputeti demokrat.
