Higuain u afrua tek Milani si ‘njeriu gol’, por në përballjen me Juventusin dështoi në gjithçka. Bomberi argjentinas i kishte të gjitha mundësitë që të ndryshonte rrjedhën e ndeshjes, kur bardhezinjtë ishin në avantazhin e një goli, por i vetëm përballë Szczesny nuk ia doli.
Penallti për Milanin dhe “El Pipita” merr përsipër ekzekutimin. Në atë moment ndërhynë Cristiano Ronaldo dhe shkon i thotë diçka në vesh portierit të Juventusit. E cila, sipas portierit bardhezi, kishte të bënte me mënyrën si i gjuan penalltitë Higuain. Polaku e kuptoi krahun e goditjes së topit, e devijoi paksa atë, por e ndihmoi edhe shtylla për t’i thënë “jo” golit të barazimit.
“E njoh dhe i njoh penalltitë e tij… Sigurisht, jemi stërvitur shumë bashkë ndaj edhe e dija se si do të godiste. Ai më njeh mua gjithashtu. Godet fort dhe me top në tokë, por në këtë rast isha edhe me fat, sepse shtylla më erdhi në ndihmë”, përfundoi polaku.
“Ajo që më pëshpëriti në vesh Cristiano Ronaldo, para goditjes së penalltisë? Më tha se Higuain i godet tokazi dhe fort 11-metërshat. Këtë gjë e dija, sepse kemi luajtur bashkë për një vit te Juventusi, por ndoqa këshillën e Ronaldos për krahun, nga duhej të hidhesha”–rrëfeu Szczesny pas fitores kundër Milanit, i cili po shijon rolin e titullarit tashmë te bardhezinjtë.
Në fund Higuain nuk i përmbajti më nervat dhe iu sul arbitrit pas një faulli në mesfushë, por më pas meritoi të kuqin që e largoi nga fusha. Të gjithë u përpoqën ta qetësojnë argjentinasin, mes tyre dhe Ronaldo, por Higuain duket se kishte inate të vjetra me portugezin dhe ‘tradhtia’ tek penalltia e bëri që të mos përmbahej dhe ti sulej atij.
