Një ngjarje e rëndë ka ndodhur në Kosovë natën e sotme, ku trajneri i skuadrës së Llapit, Bylbyl Sokoli është sulmuar në hyrje të banesës së tij. Gjithçka ka ndodhur pasi skuadra që ai drejton është mposhtur ditën e sotme në përballjen me Prishtinën.
Sokoli është dhunuar fizikisht nga tre persona para banesës së tij në rrugën “Luan Haradinaj”, bëjnë me dije mediat kosovare.
Policia dhe ambulanca kanë mbërritur menjëherë në vendin e ngjarjes, ndërsa trajneri Sokoli është duke marrë trajtimin mjekësor. Ky sulm, vjen vetëm një orë, pasi përfundoi ndeshja e Prishtinës me Llapin, që u mbyll me fitoren e ekipit të Josës me shifrat 2-1.
Lajmin e ka konfirmuar zëdhënësja e Policisë së Kosovës për rajonin e Prishtinës, Flora Ahmeti.
“Sot rreth orës 20:30 e kemi pranuar informatën se në rrugën Hajdar Dushi në Prishtinë një person është sulmuar fizikisht nga disa persona të dyshuar. Personi i sulmuar B.S. është dërguar për tretman mjekësor, ndërkohë që policia po merret me rastin”, ka thënë zëdhënësja Ahmeti.
