Një grua 50-vjeçare ka humbur jetën, ndërsa bashkëshorti dhe djali i saj kanë mbetur të plagosur, pas një aksidenti të rëndë ndodhur mbrëmjen e djeshme në Lushnje. Bëhet fjalë për Teuta Aliçkolli 50-vjeçe, ndërsa janë lënduar burri Alfred Alickolli 54-vjeç dhe djali Ani Aliçkolli 24-vjeç.
Sipas njoftimit të policisë, një makinë tip “Volkswagen” me drejtues një 22-vjeçar me inicialet A.H., në gjendje të dehur që po lëvizte me shpejtësi, ka dalë nga rruga duke kaluar bordurën, dhe ka marrë përpara një familje që ishte në lulishte duke pirë kafe, ndërsa ka thyer edhe disa pemë.
50-vjeçarja u transportua me shpejtësi në spital, por gjendja shëndetësore ishte mjaft e rëndë, pasi makina e zuri poshtë dhe nuk arriti që t’u mbijetonte plagëve. Burri dhe djali i viktimës ndodhen në spital me plagë të rënda, por jashtë rrezikut për jetën.
Ndërkohë, policia ka ndaluar drejtuesin e mjetit dhe po punon për zbardhjen e shkaqeve të aksidentit.
