Kreu i qeverisë Edi Rama ishte i pranishëm në Librazhd, ku prezantoi kandidatin e Partisë Socialiste, Kastriot Gurrën. Gjatë fjalës së tij para elektoratit, Rama u shpreh edhe njëherë se nuk ka asnjë lëkundje për datën 30 qershor, për mbajtjen e zgjedhjeve në vend. Po ashtu theksoi se Librazhdi ishte një nga zonat ku PS kishte arritur fitoren më të thellë në 2017-ën.
Kryeministri Edi Rama, u ka kujtuar edhe një herë të gjithë qytetarëve, se çdo tentativë për të bllokuar apo penguar procesin zgjedhor, dënohet me ligj.
“Kam dëgjuar shpesh që thonë 1997, 1997! Por me kë do ta bëjnë? Me ato 100 mjeranë atje që kishin zënë rrugën dhe gjuanin me gurë dhe kapsolla të drejtuar nga politikanë qorra që u shërbejnë, Metës, Bashës, Saliut dhe Monikës?!” Sot shkelën një nga nenet, pengimin e fushatës dhe dënohen nga 1-5 vite. Sakrifikojnë lirinë e tyre, për kë? Hallin e katër aventurierëve që e çuan opozitën në drejtim të paditur.
Në 30 Qershor ne do të vijojmë rrugën dhe kush do të guxojë të na dalë përpara do të përballet me ligjin, jo vetëm shqiptar. Qeveria amerikane i drejtoi gishtin me emër dhe mbiemër, Bashës dhe Kryemadhit që do të jenë përgjegjës, se qartësisht se atyre që vijojnë këtë rrugë do u hiqet e drejta për të hyrë në SHBA. E dëgjuat vetë nga Presidenti i KE-së dhe të gjithë europianët janë për zbatimin e ligjit në 30 Qershor“, u shpreh Rama duke komentuar kështu tentativën e disa militantëve të PD për ti bllokuar rrugën për mitingun në këtë qytet.
