Sikundër e paralajmëroi një ditë më parë, kryetari i Partisë së Lirisë, Ilir Meta, ka zbuluar detajet e protestës së parë nga ana e kësaj force politike, pasi ai mori drejtimin e saj.
Protestën e parë, Partia e Lirisë do ta organizojë pas një jave në orën 18:00 te incineratori i Tiranës.
“Ne i konsiderojmë këto protesta në radhë të parë si protesta të qytetarëve. Këtë rast kemi marrë ne iniciativën, se jemi marrë gjatë me çështjen e inceneratorëve.
Të gjithë janë të mirëpritur në radhe të parë qytetarët, se janë taksat e tyre që vidhen.
Protesta e parë e Partisë së Lirisë, në 13 shtator, ora 18:00, në inceneratorin e Tiranës, “kryeveprën” e korrupsionit të Qeverise. Ftojme te gjithë qytetaret”, tha Meta.
Dje Ilir Meta njoftoi se Partia e Lirisë do të nisë protestat së shpejti. Në një konferencë për mediat, Meta u shpreh se këtë sesion të ri parlamentar do të shfaqet shpesh para Kuvendit për të protestuar.
