Me një pasuri prej 85.5 miliardë dollarësh, “Orakulli i Omahas”, është aktualisht njeriu i gjashtë më i pasur në botë, edhe pse nuk sillet si një i tillë. Shtëpia e tij modeste në Nebraska, vlen vetëm 0.001 për qind të pasurisë së tij totale, dhe ai nuk shpenzon kurrë më shumë se 3 dollarë në mëngjesin e tij të përditshëm tek McDonald.
Por ata që e kanë njohur që të vogël, nuk befasohen nga suksesi i tij. Që kur ishte 11-vjeç, investonte duke blerë aksione në bursë, ndërsa deri në moshën 16-vjeçare kishte akumuluar një pasuri prej rreth 45.000 eurosh. Por Bafet nuk është vetëm një mjeshtër në fitimin e parave, por edhe në dhurimin e tyre.
Edhe pse vetëm kohët e fundit ka filluar të bëjë bamirësi me insistimin e gruas së tij të parë, Bafet cilësohet tani si një nga filantropët më bujarë në botë, me më shumë se 27 miliardë dollarë të investuara gjatë dekadës së fundit në donacione apo kauza të ndryshme humanitare. Ja çfarë mund të mos dini mbi jetën e këtij njeriu:
Ndërsa shokët e klasës së tij në shkollën fillore ëndërronin të bëheshin sportistë apo të punonin në Hollivud, Bafet ishte vetëm 10-vjeç kur drekoi bashkë me të atin me një tregtar të Bursës së Nju Jorkut. Duke dëgjuar bisedën mes tyre, ai i vuri vetes synimin për t`u bërë një bisnesmen.
Aksionet e para në bursë i bleu në moshën 11-vjeç. Konkretisht bleu aksionet e “Cities Service” për 32 euro secili. Gjatë adoleshencës së tij, Bafet fitonte tashmë rreth 150 euro në muaj; më shumë sesa profesorët e tij (dhe shumë të rritur të tjerë). Në moshën 16 vjeçare ai tashmë kishte grumbulluar ekuivalentin e rreth 45.000 eurove me kursin e sotëm.
Pikërisht në atë kohë ai filloi punë si shpërndarës gazetash. Dhe ky ishte vetëm një nga aktivitetet e tij të shumta. Njëkohësisht ai merrej me shitjen e topave të përdorur të golfit, pullave postare, merrej me larjen e makinave etj.
U refuzua nga Shkolla e Biznesit në Harvard. “Unë isha 16-vjeç, por emocionalisht dukesha si 9”- tha ai më vonë duke kujtuar intervistën e pranimit. I detyruar të shkonte diku tjetër, ai zgjodhi Universitetin e Kolumbias, që i kërkoi vetëm paraqitjen e një aplikimi me shkrim, pa pasur nevojë të kalonte intervistën.
Bafet shpenzoi në një rast 85 euro për të blerë 1 orë kohë në “Dale Carnegie” për të folur në publik. Ai ishte 21 vjeç dhe kishte shumë drojë nga të folurit në publik. Investimi ishte me vlerë, pasi e ndihmoi t’i propozonte për martesë gruas së tij të parë.
Shtëpia e tij modeste në Omaha të Nebraskas ka vetëm 5 dhoma. Ajo u ble në vitin 1956 për 26.519 euro. Por nëse doni të bëheni fqinj me Bafet, shtëpia matanë rrugës do t’iu kushtojë rreth 1.81 milion euro.
Bafet nuk ka një kompjuter në tryezën e tij, ai preferon të përdorë celularin klasik dhe jo një smartfon. Mjeti më teknologjik që do të gjeni në zyrën e tij është një telefon fiks. Gjatë gjithë jetës së tij ai dërgoi vetëm një email tek Xhef Rajks i kompanisë “Microsoft”.
Miliarderi e kalon 80 për qind të ditës duke lexuar, ndërsa konsumon çdo ditë një sasi të madhe Coca-Cola. 99 për qind të pasurisë së tij përrallore e krijoi pas ditëlindjes së tij të 50-të.
Kur bleu kompaninë “Berkshire Hathaway”, 1 aksion kushtonte vetëm 16 dollarë, ndërsa sot vlen rreth 10.9 milion euro. Ai e mori kompaninë e tekstilit që po falimentonte dhe e shndërroi atë në një shumëkombëshe legjendare.
Pasuria neto e Bafet është më e madhe se PBB-ja e Uruguait, që në vitin 2014 ishte 48.3 miliardë euro.
Në vitin 2010, ai bashkë-themeloi “The Giving Pledge” me Bill dhe Melinda Gejtsin, një nismë që u kërkon njerëzve më të pasur në botë, që pjesën më të madhe të pasurisë së tyre t’ia kushtojnë filantropisë. Bufet ka dhuruar deri më tani 25.2 miliardë euro, donacioni i dytë më i madh pas Bill Gejst.
Në vitin 2013, Bafet fitoi mesatarisht 37 milion dollarë në ditë. Njerëzit janë aq të magjepsur nga legjenda e Bufet, saqë shpenzojnë miliona dollarë për të drekuar me të. Ai nuk beson se paratë janë sinonim i suksesit: “Unë e mas suksesin tim nga mënyra sesi njerëzit më duan. Dhe mënyra më e mirë për t’u dashur është të jesh i dashur më të tjerët”.
Burimi i lajmit: https://it.businessinsider.com/24-notizie-strabilianti-su-warren-buffett-che-ha-iniziato-a-comprare-azioni-a-11-anni-e-nel-2013-ha-guadagnato-37-milioni-al-giorno/
Përshtatur nga TIRANA TODAY