Anestezistja Alma Neco është pjesë e ekipit mjekësor që u drejtua drejt Italisë, për t’i ardhur në ndihmë vendit fqinj. Ajo u rrëfye se nuk ka frikë, pasi rrezikun e ka marrë përsipër që kur ka vendosur që të trajnohet për këtë profesion.
E pyetur për arsyen se përse iku në Itali, anestezistja u shpreh se e ndjente si një detyrim, pasi ajo kishte lindur në këtë vend dhe prej vitesh ka jetuar atje.
Edhe pse ajo është caktuar në një spital në Brescia, e cila regjistron numrin më të madh të të infektuarve dhe viktimave, Alma thotë se nuk ka frikë. Po kështu, ajo është shprehur më tej se edhe në Shqipëri nuk mungon rreziku, dhe se në këtë aspekt nuk ndryshon asgjë.
“Të gjithë kemi një lidhje me Italinë. Unë në Itali kam lindur dhe jam rritur, dhe e ndjeja si një detyrim. Rreziku ekziston, por ne e kemi marrë përsipër rrezikun që në momentin që kemi marrë përsipër këtë profesion. Edhe në Shqipëri kishte rrezik, kështu që nuk ndryshon ndonjë gjë në këtë aspekt. Prindërit më kanë mbështetur maksimalisht. Më kanë caktuar në Brescia, në spitalin me më të prekurit në Lombardi, dhe me më të infektuarit në Itali. Përsëri kjo nuk është ndonjë ndryshim, pasi ne anestezistët jemi mësuar me vrull. Madje mezi po pres që të fillojmë”, ka deklaruar ajo në studion e emisionit “Shqipëria Live”, në “Top Channel”.
10 mjekë dhe 20 infermierë nga Shqipëria kanë mbërritur në Itali, për të ndihmuar në kuadër të situatës alarmante të COVID-19. Ata do të ndihmojnë Italinë e gjunjëzuar nga koronavirusi, si një shenjë falenderimi në emër të të gjithë shqiptarëve.
Mjekët do të qëndrojnë për një muaj në Itali, dhe do të paguhen nga Shqipëria.
