Ish-ministri i Bujqësisë Edmond Panariti, ka reaguar lidhur me padinë që depozitoi sot në SPAK deputeti Myslim Murrizi. Ky i fundit depozitoi kallëzim penal për dy tendera që janë bërë në vitet 2013 dhe 2017, kohë kur Ministria e Bujqësisë drejtohej nga Panariti.
Duke e cilësuar padinë më unike në botë, Panariti i drejtohet Murrizit dhe i thotë se duhet të “korrigjojë shënjestrën e opozitarizmit”. Ai thotë se kjo padi është për diçka që nuk ka ndodhur kurrë.
Panariti sqaron më tej se nuk ka patur, dhe nuk ka tender të organizuar nga Ministria e Bujqësisë për sistem të vaditjes me pika me ujë të lumit Shkumbin, për Bashkinë e Divjakës.
Duke qëndruar në të njëjtën linjë, Panariti shton më tej se i vetmi investim madhor i realizuar në Sistemin Kombetar të Vaditjes ka qenë ai i Bankës Botërore, i kryer për infrastrukturën e digave dhe të kanaleve të para dhe të dyta të vaditjes.
Statusi
Korrigjo shënjestrën e opozitarizmit Z. Murrizi!
U njoha me padinë më unike në botë ndaj Ministrisë së Bujqësisë të kryer nga opozitari i opozitës Murrizi.
Padi për diçka që nuk ka ndodhur kurrë !
Pra një padi për diçka që nuk ekziston!
Sepse nuk ka patur, dhe nuk ka tender të organizuar nga Ministria e Bujqësisë për sistem të vaditjes me pika me ujë të lumit Shkumbin për Bashkinë e Divjakës, siç deklaron prej kohësh paditësi opozitar i opozitës!
Nuk ka!
Kjo është lehtësisht e verifikueshme
Pra është qesharake të paditësh pa objekt padije.
I vetmi investim madhor i realizuar në Sistemin Kombetar të Vaditjes , ka qenë ai i Bankës Botërore, i kryer për infrastrukturën e digave dhe të kanaleve të para dhe të dyta të vaditjes.
Një ndër ndërhyrjet më të suksesëshme në sistem.
Dorëzuar me çelsa në dorë me funksione të plota vaditjeje, Bashkive përfituese që prej afër 5 vitesh .
Prandaj korrigjo shënjestrën e opozitarizmit tënd zoti Murrizi!
Kaq.
