“Arrest me burg” është masa e caktuar nga Gjykata e Tiranës për një 27 vjeçar nga Kamza, i cili ditë më parë kishte dhunuar barbarisht vajzën e tij. Me veprimet e tij, ai shokoi mbarë opininin publik, ndërsa raportohet se e mitura vijon të jetë nën kujdesin e bluzave të bardha në spital.
Denoncimi tronditës u bë nga nëna e 6-vjeçares, ndërsa dyshimet janë edhe për abuzim seksual. Dhuna e të riut ndaj të bijës ka qenë kafshërore. Ai i ka shkaktuar dëmtim të organeve të brendshme, duke shkaktuar hemorragji. Ngjarja tronditëse ka ndodhur disa ditë më parë, ku babai teksa ka qenë vetëm me vajzën, e ka dhunuar rëndë me pretendimin se ajo po e bezdiste.
Sipas dosjes hetimore, rezulton se vajza është goditur nga babai i saj me thupër dhe është kafshuar në pjesë të ndryshme të trupit.
Një grup specialistësh do të kryejë akt-ekspertimet për të parë nëse me të miturën është abuzuar seksualisht. Prej disa ditësh ajo ndodhet në Spitalin e Traumës, ku ka pasur lëndime në organet e brendshme. Nga dëshmitë e marra, rezulton se vajza ka shfaqur shqetësime në shkollë deri në të vjella.
