Kryeministri Edi Rama pritet me protesta e thirrje kundër në Shkodër. Rama do të jetë sot në Shkodër në kuadër të takimeve “Bashkia që Duam” por protestues të shumtë, mbështetës të PD-së i kanë zënë rrugën në urën e Bahcallëkut. Ata janë ulur në tokë, ndërkohë që disa metra para tyre kanë vendosur goma dhe iu ka vënë flakën. “Rama ik”, janë thirrjet e protestuesve.
Në vend kanë shkuar edhe forca të shumta policie të cilat po përpiqen të largojnë protestuesit. Gjithashtu protestues të tjerë janë mbledhur edhe në urën e Spatharit në Vau Dejës duke bllokuar të dy anët që lidhen me Shkodrën.
Por nga ana tjetër nuk dihet nëse Rama do të shkojë sot në Shkodër apo ka lëvizur që mbrëmjen e kaluar. Në krye të protestuesve janë edhe ish-deputetë të PD-së. Ish-deputeti Flamur Noka tha : “Sot janë qytetarët për të protestuar dhe për të ndaluar ardhjen e tij. Ai sot nuk është kryeministër i Shkodrës dhe i Shqipërisë. Siç kemi bërë me dije opozita është në protesta deri në largimin e Ramës dhe krijimin e një qeverie tranzitore, për t’i hapur rrugë zgjedhjeve të lira. Sot Shqipëria është peng i një bande. E ka futur në kthetrat e krimit.”, ka thënë Flamur Noka nga protesta. Ai deklaroi se do vazhdojnë me protesta dhe përshkallëzimin e tyre.
Kreu i PD-së Lulzim Basha ka qenë mbrëmjen e kaluar në Shkodër ku ka konsumuar një darkë me ish-deputetë të PD, kryetaren e Bashkisë e përfaqësues të tjerë të PD.
