11 të vrarë dhe 2 të zhdukur brenda 8 muajve. Ky është bilanci tragjik i luftës mes grupeve kriminale në Shkodër. Vrasja e vëllezërve Brahim dhe Astrit Bilali kanë rikthyer vëmendjen tek përplasjet e ashpra mes grupeve në këtë qytet, i cili ka shkaktuar terror dhe pasiguri në qytet.
Gazetari Artan Hoxha ka lexuar një mesazh që i ka shkruar Astrit Bilali, i ekzekutuar sot në Shkodër së bashku me vëllanë e tij Brahimin, menjëherë pas vrasjes së Boran Bërçanës dhe bashkëjetueses së tij Silvi Ndoci në Shkodër.
Ngjarja e rëndë ka ndodhur në 15 korrik, kur Bërçana e ekzekutua teksa ishte në mjetin e tij, në prezencë të gruas dhe fëmijës së tyre të mitur, i cili shpëtoi teksa ishte në prehërin e nënës së tij.
Nga studio e ‘Report Tv’, gazetari Artan Hoxha lexoi një mesazh që Astrit Bilali i kishte çuar në celular pas krimit, ku hidhte dyshimin se qëllimisht nuk po zbuloheshin autorët.
Mesazhi
Nuk e kuptoj pse shteti po përkrah një nga këto banda, dhe shteti hesht edhe në media ka heshtje për hetimet. Ose dikush ka dhënë urdhër të rrinë urtë, dhe mos të zbulohet autori i vrasjes së çiftit. Kam përshtypjen se vrasësi i çiftit është i kollajtë për tu zbuluar, nuk e di pse ka heshtje dhe hezitim për këtë gjë.
