Ambasada Amerikane në Tiranë ka komentuar ndryshimet e bëra së fundmi në Ministrinë e Brendshme. Në një reagim në profilin e saj në Facebook, shkruhet se në muajt e fundit ka pasur një përparim në luftën kundër krimit të organizuar e korrupsionit.
Më tej, ambasada inkurajon për vazhdimin e kësaj pune, ndërsa shpreh gatishmërinë për punën me partnerët shqiptarë.
Njoftimi si më poshtë:
Përgjatë muajve të fundit, jemi inkurajuar nga përparimi që kemi parë në luftën kundër krimit të organizuar dhe korrupsionit në Shqipëri – rezultat i drejtpërdrejtë i punës së bërë nga autoritetet shqiptare, veçanërisht oficerëve të policisë dhe prokurorëve, të cilët luftojnë për drejtësi të vërtetë për të gjithë shqiptarët. Ka ende punë për të bërë dhe presim që këto përpjekje jo vetëm të vazhdojnë, por edhe të shtohen. Një Ministri e Brendshme plotësisht funksionale është një element kyç për të siguruar vazhdimësinë e këtyre përpjekjeve dhe rezultateve të deritanishme. Qeveria e SHBA qëndron e gatshme për të punuar me partnerët tanë shqiptarë. Ne do të ofrojmë asistencë kudo që të jetë e mundur për të ndihmuar mposhtjen e krimit të organizuar e korrupsionit, për të vazhduar përparimin e reformës në drejtësi, dhe për të siguruar sundimin e ligjit për popullin shqiptar.
