Kreu i Partisë Republikane, Fatmir Mediu, po zhvillon një takim me ambasadorin amerikan, Donald Lu.
Takimi ka nisur që prej orës 10:30, ndërsa Lu dhe Mediu po diskutojnë për zhvillimet e fundit politike në vend.
Takimi vjen pas refuzimit të kreut të Partisë Demokratike për t’u regjistruar në KQZ për zgjedhjet e 18 qershorit.
Basha është shprehur i prerë sa i takon bojkotimit të zgjedhjeve, teksa ka thënë se vetëm qeveria teknike do të zgjidhte krizën politike.
Vetëm një ditë më parë, Mediu tha se Basha duhet të mbledhë forumet e PD-së dhe diskutojë mbi zgjedhjet dhe bojkotin, duke vënë në pikëpyetje këtë të fundit.
“Vendimmarrja në politikë duhet të funksionojë përmes forumeve. Dhe është përgjegjësi e z.Basha që të ulet dhe të analizojë kush është vendimi më i drejtë.
Mbledhja e forumeve është domosdoshmëri dhe z.Basha uroj ta ketë bërë këtë ose duhet ta bëjë. E rëndësishme është pjesëmarrja në zgjedhje, por ne kemi ngritur shqetësimin se krimi i organizuar, korrupsioni cenojnë procesin. Ne jemi për një proces zgjedhor të lirë dhe të ndershëm”.
Mbetet për t’u parë, nëse PR-ja, aleate me PD-në, do të ndryshojë qëndrim pas takimit të Mediut me Lu-në.
