Në rang global, koronavirusi vijon të marrë jetë. Deri më tani janë regjistruar 3200 viktima. Nga koha e shpërthimit të epidemisë në dhjetor, ekspertët janë të mendimit se koronavirusi ka pësuar mutacion në të paktën dy versione.
Askush nuk ka qënë në dijeni se njerëzit anembanë botës janë prekur nga dy modele të koronavirusit. Për fat të keq, thonë studiuesit, 70 për qind e të prekurve kanë variantin më agresiv të koronavirusit.
Kjo e dhënë është përcjellë nga ekspertët në Pekin dhe Shangai, ndonëse është ende herët për të folur për diçka konkrete, pasi kërkimet vijojnë ende në këtë fushë. Shkencëtarët konfirmojnë se tashmë ka dy tipe të të njëjtit lloj të koronavirusit që infekton njerëzit. Pjesa më e madhe e të prekurve kanë formën më agresive të tij.
Të paktën 93 mijë persona janë infektuar në të gjithë botën, ndërsa 50 mijë të tjerë po trajtohen në spital. Ekipe ekspertësh nga Pekini dhe Shangai pohojnë se 70 për qind e njerëzve janë prekur nga forma më agresive e virusit, i cili shkakton një sëmundje të rëndë aq sa ka qenë pothuajse e pamundur të frenohet përhapja e saj që nga muaji janar.
Aktualisht një formë më e vjetër e virusit rrezikon të bëhet më e zakonshme. Duke ditur se virusi mund të pësojë mutacion, e bën më të vështirë gjurmimin e tij, apo trajtimin dhe shton dyshimet se pacientët e shëruar njëherë nga ky virus, mund të infektohen sërish.
Kërkuesit nuk kanë dalë në rezultatet përfundimtare, e ndërsa për këtë studim janë përdorur 103 kampionë.
Dy versionet e koronavirusit janë pagëzuar me gërmat L dhe S. 70 për qind e pacientëve mendohet të kenë formën L, që është më agresive dhe përhapet më shpejt se S-ja.
Por L-ja nuk është aq e përhapur sa forma më e lehtë e koronavirusit S. Dhe pse kjo e fundit është më pak agresive, mendohet se është ai lloj virusi që ka kaluar tek njerëzit dhe vazhdon të infektojë.
Kjo ndodh sepse simptomat janë më të lehta dhe njerëzit nuk shkojnë menjëherë në spitale, duke mundësuar përhapjen e virusit. Po sipas ekipit të ekspertëve të Pekinit dhe Shangait, lloji L ishte më dominues në fazat e para të përhapjes së virusit. Meqënëse forma L e virusit ishte më e rëndë, pacientët janë mjekuar më herët dhe kjo ka penguar përhapjen e tij.
Organizata Botërore e Shëndetit ka ndjekur hap pas hapi gjendjen kaotike që ka shkaktuar koronavirusi.
OBSH-ja ka paralajmëruar se jemi në një mungesë globale produktesh mjekësore, dhe abuzim me çmimet për pajisjet mbrojtëse kundër përhapjes së koronavirusit. Ndaj OBSH-ja u ka kërkuar kompanive dhe qeverive që të rrisin prodhimin me 40%, ndërkohë që në botë po rritet numri i të infektuarve dhe viktimave nga koronavirusi.
Në këtë kohë, rezerva Federale Amerikane ka ulur normat e interesit, në një veprim urgjent në mënyrë që të shmangë një recesion global, ndërsa Banka Botërore njoftoi se do të japë 12 miliardë dollarë për të ndihmuar vendet që janë prekur nga virusi.
