Pak çaste më parë ka nisur seanca e parë gjyqësore në Hagë, ndaj ish-zëdhënësit të Ushtrisë Çlirimtare të Kosovës, Jakup Krasniqi. Ai është arrestuar më 4 nëntor nga hetuesit e Speciales, pas dhjetë orësh bastisje që kanë bërë në shtëpinë e tij.
Përveç Krasniqit, Specialja javën e kaluar ka konfirmuar aktakuzat edhe për tre ish-pjesëtarët e UÇK-së, Hashim Thaçi, Kadri Veseli dhe Rexhep Selimin.
Gjykatësi i procedurës paraprake, bëri të ditur se për çfarë akuzohet Krasniqi:
“Gjashtë akuza për krime kundër njerëzimit. Përndjekje, burgosje, akte të tjera çnjerëzore, torturë, vrasje dhe zhdukje me forcë e personave. Katër akuza për krime lufte: ndalim arbitrar, trajtim mizor, torturë dhe vrasje e paligjshme”, tha ai.
Ai është pyetur se nëse kupton gjuhën shqipe, dhe Krasniqi duke qeshur tha: “E flas dhe e kuptoj mirë gjuhën shqipe”.
“Po e kam marrë akt-akuzën, e kam marrë në 4 nëntor. Pasi kemi ardhur në Hagë, e kemi marrë variantin e korrigjuar. Ishte në gjuhën shqipe, e kam kërkuar dhe dëgjuar mirë. I kuptuat akt-akuzat? Dua të them dy tre çështje dhe do të përpiqem t’i them shkurt. Jam arrestuar më 4 nëntor 2020. Po na quani ndërmarrje kriminale të përbashkët. Deklaroj se kurrë në jetën time, në asnjë rast nuk i kam të vetëm, nuk i kam treguar njerëzit as kaq (tregon me gisht) sa më trajtuan mua nga ndërtesa e burgut deri më tani. E ndjej veten më shumë se mirë, dhe kurrë nuk do të dëshiroja që të isha nën petkun e njerëzve me shpirt krimineli. Jam intelektual, unë jam shqiptar. Nuk jam as katolik edhe mysliman. Kjo është fyese edhe për mua dhe për popullin tim!”.
