Kryeministri Rama na ndarë me ndjekësit në profilin e tij në Facebook, një histori se si lindi karantina. I referohet një studiuesi persian të mjekësisë, Ibn Sina (980-1037), i cili dyshoi se disa sëmundje përhapeshin nga mikroorganizmat. Për ta parandaluar infektimin mes njerëzve, ai shpiku metodën e izolimit për 40 ditë.
Dje në orën 13:00 nisi shtetrrethimi në të gjithë Shqipërinë, në kuadër të masave të marra për parandalimin e përhapjes së COVID-19.
Nga e hëna e javës tjetër, fasha orare do të zgjatet deri në 17:30 për qytetarët, shërbimet ushqimore, farmacitë dhe bankat. Autorizimet për leje-dalje për pazar do të jenë 90 minuta.
Qeveria shqiptare e sheh fundin e muajit maj si një afat kohor optimist për të dalë nga faza e parë e përballjes me COVID-19.
Statusi
? JA SI LINDI KARANTINA
Studiuesi persian i mjekësisë, Ibn Sina (980-1037), dyshoi se disa sëmundje përhapeshin nga mikroorganizmat! Për të parandaluar infektimin nga njeriu tek njeriu, ai shpiku metodën e izolimit të plotë të njerëzve për 40 ditë. Këtë metodë e quajti al-Arba’iniya -“Dyzeta”.
Tregtarët nga Venediku kishin dëgjuar për metodën e tij të suksesshme dhe e sollën atë në Itali. E quajtën “Quarantena” (“Dyzeta” në italisht). Kjo është edhe fillesa e fjalës “karantinë”. Kurani i Shenjtë thotë: “Kush shpëton një jetë njerëzore, është njësoj si të ketë shpëtuar të gjithë njerëzimin” (5:32). Ende sot, metoda e Ibn Sina-s shpëton jo mijëra, po ndoshta miliona jetë.
Emri i plotë i Ibn Sina-s ishte Abu Ali Al-Hussein Ibn Abdullah Ibn Sina. Në perëndim e njohin edhe me versionin latin të emrit të tij: Avicenna⭐️
