Gjykata e Korçës ka vendosur sekuestrimin e një prone të ish-drejtorit të Postës në Korçë, Valter Gorës, i cili u arrestua para një muaji për “shpërdorim detyre”. Vendimi për sekuestron preventive e ka marrë Gjykata e Rrethit Gjyqësor Korçë, më datë 28.07.2021. Dyshohet se të ardhurat e paligjshme të përfituara nga aktiviteti kriminal i Valter Gorës, janë investuar në blerjen e këtij ambienti, i cili ishte në përdorim të filialit të Postës Shqiptare (i lëshuar me qira).
Nga ana e policisë vijon puna për të verifikuar dhe evidentuar pasuritë e tjera, që mund të jenë në emër të 41-vjeçarit dhe bashkëpunëtorëve të tjerë të tij.
Valter Gora, ish-drejtor i Postës u arrestua më 15 korrik nga policia, pasi së bashku me kolegët e tij kishin “shpërdoruar detyrën”. Operacioni “Kontrata” zbuloi skemën e mashtrimit që ndodhte brenda postës.
Të gjithë punonjësit shpërdorun detyrën, duke falsifikuar kontrata qiramarrjeje për ambiente që do të përdoreshin nga Posta Shqiptare në filialet Korçë, Maliq, Pogradec. Ish-drejtori i Postës Shqiptare Dega Korçë, Valter Gora, 41-vjeç, dhe Alban Bibo, 34-vjeç, banues në Korçë (me detyrë ish-specialist sigurie pranë këtij institucioni) u vunë në pranga, pasi u akuzuan për “falsifikim dokumentesh”.
Njoftimi
Sekuestro preventive mbi një pronë të ish-Drejtorit të Postës Korçë, i cili u arrestua një muaj më parë, në kuadër të operacionit policor “Kontrata”. Nga specialistët për Hetimin e Krimit Ekonomik-Financiar në Drejtorinë Vendore të Policisë Korçë, në bashkëpunim me Prokurorinë e Rrethit Gjyqësor Korçë dhe Komisariatin e Policisë Pogradec, në vijim të punës për identifikimin dhe gjetjen e aseteve kriminale që rrjedhin nga veprimtaria kriminale, u bë ekzekutimi i vendimit të Gjykatës së Rrethit Gjyqësor Korçë datë 28.07.2021, për vendosjen e sekuestros preventive ndaj një prone në qytetin e Pogradecit, konkretisht lokal shërbimi, në pronësi të shtetasit V. G., i cili u arrestua në datë 14.07.2021, në kuadër të operacionit policor “Kontrata”, për veprat penale “Shpërdorimi i detyrës” dhe “Falsifikimi i dokumenteve”, kryer në bashkëpunim. Nga hetimet e kryera, dyshohet se të ardhurat e paligjshme të përfituara nga aktiviteti kriminal i shtetasit V. G., janë investuar në blerjen e këtij ambienti, i cili ishte në përdorim të filialit të Postës Shqiptare (i lëshuar me qira). Vijon puna për të verifikuar dhe evidentuar pasuritë e tjera, që mund të jenë në emër të 41-vjeçarit V. G. dhe bashkëpunëtorëve të tjerë të tij. Materialet i kaluan Prokurorisë për veprime të mëtejshme.
