Gjykata e Posaçme e Apelit, ka rrëzuar shkallën e parë duke i rikthyer masën e sigurisë “arrest shtëpie” për gjyqtaren, Mimoza Margjeka. Dy javë më parë, shkalla e parë caktoi masën “detyrim paraqitje” për gjyqtaren, por Apeli e rrëzoi atë duke ashpërsuar masën ndaj ish-gjyqtares së Korçës.
Në arrest shtëpie, është lënë edhe bashkëshorti i saj Arben Cara, të cilët akuzohen për korrupsion. Mësohet se seanca për masën ndaj tyre është zhvilluar me dyer të mbyllura.
Bashkë me ta u arrestua edhe avokati dhe vëllai i Orion Balit, Skënder Damini dhe Nejton Bali, si edhe sekseri Kaludio Zhilla.
Margjeka akuzohet nga SPAK për korrupsion, pasi nga përgjimet e Prokurorisë së Posaçme rezultoi se, Margjeka ka marrë 6000 euro në këmbim të nxjerrjes së të burgosurit, Orion Balit nga qelia kundrejt “garancisë pasurore”.
