Gjykata e Tiranës la në masën e sigurisë “Arrest në burg” Blendi Tetën, i arrestuar tri ditë më parë, pasi dyshohet se ka pasur dijeni për vrasjen e ish-policit Santiago Malko, dhe me veprimet e tij ka penguar zbardhjen e ngjarjes. Shtetasi Blendi Teta akuzohet nga Prokuroria se ka pasur dijeni për ekzekutimin e ish-policit, pasi është parë në kamerat e sigurisë në vendin e ngjarjes, ditën që ka ndodhur vrasja.
Hetimet
Fillimisht 39-vjeçari mohoi akuzat, duke u shprehur përballë grupit hetimor se ka qenë kalimtar i rastit. Por pas vënies përballë fakteve nga akuza, ku ai ishte parë të kalonte disa minuta përpara ngjarjes në një automjet duke folur në telefon, Tata ka ndryshuar dëshmi duke thënë se ai nuk ka pasur dijeni për atentatin.
39-vjeçari bashkëpunon me autoritetet
Burime nga grupi hetimor bëjnë me dije se 39-vjeçari ka pranuar të bashkëpunojë me autoritetet, por ka mohuar të ketë lidhje me vrasjen. Togat e zeza kanë caktuar masën e sigurisë “arrest me burg”. Ai u arrestua për moskallëzim krimi dhe veprime që pengojnë zbulimin e së vërtetës. Por dëshmia e tij ka zbuluar emrat e autorëve dhe motivet e krimit.
Teta është pikasur në një nga mjetet që ishte në ndjekje të makinës së Malkos, por duke iu referuar dëshmisë së tij, ai pasi ka kuptuar që do të ndodhte një ngjarje kriminale, është larguar.
Në kërkim tre të dyshuarit
Uniformat blu kanë shpallur në kërkim tre të dyshuarit, por nuk i bën publik emrat e tyre për shkaqe hetimore. Besohet se vrasja ka ndodhur për shkak të një konflikti të vjetër të viktimës me autorët, për çështjen e disa lotove sportive. Ish-polici u ekzekutua me armë zjarri mbrëmjen e 27 gushtit, në orën 22:20, në rrugën “Xhanfize Keko”. Njëra nga makinat e autorëve u gjet e djegur në fshatin Ferras, në periferi të Tiranës.
