Problemet me pasurinë duket se rrezikojnë karrierën e gjyqtarit të Gjykatës së Apelit për Krime të Rënda, Idriz Mulkurti, ndaj të cilit dje u zhvillua seanca dëgjimore në Komisionin e Pavarur të Kualifikimit.
Vetë gjyqtari zgjodhi të mos ishte i pranishëm në seancë, ndërsa u përfaqësua nga avokati i tij, Sokol Hazizaj. Trupi gjykues, që kreu hetimin ndaj Mulkurtit, përbëhet nga Lulzim Hamitaj, Genta Tafa (Bungo) dhe Valbona Sanxhaktari në cilësinë e relatores.
Në lidhje me kriterin e pastërtisë së figurës, Sanxhaktari relatoi se nga raporti i dorëzuar nga Drejtoria e Sigurimit të Informacionit të Klasifikuar, gjyqtari rezulton i përshtatshëm për vazhdimin e detyrës, ndërkohë edhe nga verifikimet e kryera nga KPK nuk janë konstatuar lidhje me persona të papërshtatshëm.
Sa i përket hetimit për aftësitë profesionale, relatorja tha se nga raporti i përpiluar nga Këshilli i Lartë Gjyqësor është vlerësuar si “mesatar”, ndërsa janë shënuar edhe dy denoncime nga publiku, në të cilat komisioni nuk ka gjetur indicie për hetime të mëtejshme.
PASURIA
Në lidhje me kriterin e pasurisë, raporti i dorëzuar nga Inspektorati i Lartë i Deklarimit dhe Kontrollit të Pasurisë ka dorëzuar një raport negativ për gjyqtarin Mulkurti, ndërsa, edhe sipas hetimeve të kryera nga KPK, sipas relatores, janë konstatuar problematika. Kështu, sa i takon një apartamenti me sipërfaqe 84 metra katrorë në Tiranë, blerë për 50 600 eurove, gjyqtari Mulkurti ka deklaruar si burim të krijimit një milion lekë kursime dhe 5 milionë lekë kredi të marra nga “Raiffeisen Bank”.
Pagesat për këtë apartament janë bërë në dy këste dhe nga hetimi ka rezultuar se gjyqtari nuk ka pasur burime financiare për pagimin e këstit të parë në vlerën 20 600 euro. Gjithashtu, është konstatuar se pasqyrimi i kursimeve në deklaratën veting me atë të bëra në vite nuk përputhen. Në lidhje me blerjen e një garazhi me sipërfaqe 22 metra katrorë në vitin 2010 për 14 mijë euro, gjyqtari ka deklaruar se burim i krijimit të kësaj pasurie ishte qiraja e marrë parapagim në këtë periudhë për apartamentin që zotëron në qytetin Bajram Curri.
Nga hetimi i kryer nga KPK, duke iu referuar deklarimit të vetë subjektit, ai ia ka dhënë apartamentin me qira një shoqërie për 300 euro në muaj, duke marrë si parapagim 10 800 euro. Mulkurti ka pretenduar se qiramarrësi ka qenë menaxher i një shoqërie që do të zhvillonte aktivitet në atë zonë. KPK ngriti dyshime në lidhje me çmimin e lartë të qirasë, por, sipas gjyqtarit, ishte për shkak se kishte kryer investime për rikonstruksionin dhe arredimin e apartamentit.
Nga ana tjetër, komisioni tha se gjyqtari Mulkurti nuk ka deklaruar shpenzime për këto investime. Në pronësi të gjyqtarit dhe familjes së tij, sipas relatores, janë edhe disa pasuri të tjera si një automjet tip “Benz” të blerë në vlerën e 5000 eurove, ku si burim janë deklaruar kursimet ndër vite.
Mulkurti zotëron pasuritë tokë-arë me sipërfaqe 4400 metra katrorë dhe 2600 metra katrorë në Tropojë, me pjesë takuese 50%, të trashëguara nga e ëma dhe rreth 6000 metra katrorë në fshatin Luz të Tropojës, të dhuruara nga motra. Nga hetimi i KPK-së, për gjyqtarin ka rezultuar edhe mungesë burimesh financiare për pagimin e një pagese 1.5 milionë lekë për tarifën e universitetit ku studion i biri në Britani.
Avokati ngre pikëpyetje për procesin e vetingut
Në seancën e djeshme ndaj gjyqtarit Idriz Mulkurti, i pranishëm si përfaqësues i këtij të fundit ishte avokati Sokol Hazizaj. Avokati, para se trupi të lexonte relacionin, kërkoi të fliste, duke i kërkuar KPK-së një opinion sa i takon faktit që e njëjta trupë edhe heton, por edhe gjykon hetimet e veta. Sipas Hazizajt, kjo e bën procesin të parregullt, ndërsa drejtuesi i treshes, Lulzim Hamitaj, nuk pranoi kërkesën për opinion të avokatit, duke thënë se ata mund të shqyrtojnë vetëm kërkesat procedurale. “Konstatimi ynë është fare i thjeshtë, i gjithë procesi është i karakterit administrativ dhe i referohet Kodit të Procedurës Administrative. Ky Kod, e detyron një Kolegj, një Komision apo një trupë të mos jetë në konflikt interesi, në këtë rast jo në aspektin personal. Ajo që dua të them është se qenia e një trupi që bën edhe hetimin, por edhe gjykimin, na bën të konstatojmë se ndodhemi në një proces të parregullt ligjor. Parë në këtë këndvështrim, unë do i kërkoja KPK-së nëse ka të njëjtin opinion për këtë rast. Unë nuk kërkoj përjashtimin tuaj, por një mbledhje tuajën për një opinion”, tha Hazizaj. /Panorama
