Shefja për sëmundjet infektive në Institutin e Shëndetit Publik, Silva Bino ka reaguar pas kërkes së mjekut Erion Dasho për të pezulluar vaksnimin, pasi sipas tij dy persona humbën jetën pas marrjes së vaksinës kineze.
Bino ka sqaruar se nuk ka raste të fataliteteve që lidhen me vaksinimin dhe se procesi po ecën shumë mirë.
Në lidhje me humbjen e jetës së dy të moshuarve të vaksinuar, Bino u shpreh nuk është shkak i humbjeve të jetës vaksina. Ajo tha se vaksina anticovid të mbron nga covid19, jo nga semundjet e tjera.
Bino ka bërë me dije se vaksinat janë të sigurta dhe kanë marrë autorizimin e përdorimit në vendet përkatësë, ndërkohë që janë një sërë institucionesh të tjera që bëjnë vlerësimin e tyre.
Silva Bino: “Vaksinat janë të sigurta sepse përpara marrjes së vaksinës në vendin tone, ka një seri dokumentash në një seri kriteresh, të cilat duhet të plotësohen. Ka edhe një komitet të ekspertëve për vaksinimin i cili i vlerëson të gjitha këto elemente dhe natyrisht kjo mbështetet në të gjitha të dhënat ndërkombëtare, në të gjitha vendet ku vaksinat janë përdorur në masë, në miliona njerëz edhe më tej nga studimet e publikuara’’.
Çfarë thoshte mjeku Erion Dasho lidhur me rastet e vdekjes dhe pezullimin e vaksinimit
REKOMANDIM DREJTUAR MINISTRISË SË SHËNDETËSISË DHE ÇËSHTJEVE SOCIALE!
Për shkak të të paktën dy vdekjeve të papritura midis personave që kanë kryer vaksinën CoronaVac (një prej të cilave rast i investiguar personalisht që humbi jetën një ditë pas vaksinimit), i rekomandoj Ministrisë së Shëndetësisë, Komitetit të COVID dhe Komitetit të Imunizimit të pezullojnë përkohësisht fushatën e imunizimit me CoronaVac deri sa këto vdekje të investigohen dhe të provohen si të palidhura me vaksinën në fjalë.
Kjo thirrje nuk ka aspak qëllim të ngjallë panik dhe të dëmtojë një proces të dobishëm siç është imunizimi ndaj COVID. Thjesht është në përputhje me praktikat e mira ndërkombëtare të farmakovigjilencës.
Dy humbje jete midis rreth 50 mijë të vaksinuarve është një tregues që kërkon kujdes të jashtëzakonshëm!
Mbetem i hapur për të komunikuar me përfaqësues të ministrisë dhe komitetit lidhur me rastin që kam investiguar personalisht.
