Pas largimit të Shpëtim Duros, Flamurtari ka zbritur në fushë me një fytyrë tjetër. Nën drejtimin e Ardi Beharit ekipi vlonjat ka arritur të marrë një fitore mjaft të rëndësishme përballë Teutës me rezultatin 3-1. Kjo është një fitore shprese për të vazhduar ëndrrën Europë dhe për të mos hedhur dëm gjithë sezonin. Europa është e mundshme për Flamurtarin që është vetëm 4 pikë larg Luftëtarit dhe javën e ardhshme ka një përballje direkte me gjirokastritët.
Teuta ishte duke kaluar një moment mjaft të mirë, por kjo humbje i ul me këmbë në tokë dhe i rikthen në vendin e parafundit që të dërgon në Kategforinë e Parë. Ndeshja nisi mjaft mirë për durrsakët të cilët gjetën golin shumë shpejt nga pika e bardhë e penalltisë me Anel Dedic.
Por brenda pjesës së parë Flamurtari shënoi 3 herë, 2 herë me maqedonasin Muarem Muarem i cili përmbysi shifrat duke treguar sesa vlen për herë të parë që pas mbërritjes së tij në Vlorë me shumë bujë në merkaton e janarit.
Epërsinë e dyfishtë Flamurtarit ja dha Useini në minutën e 31-të. Në fundin e pjesës së parë Teuta fitoi një tjetër 11-metërsh por këtë herë Nurkovic ndali boshnjakun Dedic. Deri në fund nuk u shënua më asnjë gol ndërsa të dyja skuadrat e mbyllën ndeshjen me nga një lojtar më pak pasi në pjesnë e dytë fillimisht Alhasaan dhe më pas Franc Veliu u ndëshkuan me kartonë të kuq.
