Anëtari i kryesisë qendrore të PDK-së, Muhamet Haliti, i cili është edhe nënkryetar i Degës së PDK-së në Pejë, ka thënë se vrasja e dyfishtë s’ka të bëjë me shkaqe politike.
“Së pari iu shprehim ngushëllime të sinqerta familjeve të Astritit e Blerandit. Nga ato që dihen deri tash, kjo ngjarje tragjike nuk ka asnjë lidhje me politikë apo me zgjedhje. Kërkojmë që organet e drejtësisë ta zbardhin sa më parë këtë ngjarje tragjike”, ka thënë Haliti.
Astrit Ademaj dhe Blerand Kadriaj janë dërguar pa shenja jete në spitalin e Pejës. Kandidati i PDK-së për kryetar të Komunës, Astrit Ademaj dhe zyrtari i të njëjtës parti, Blerand Kadrijaj, mbetën të vrarë mbrëmjen e kaluar në një lokal në Pejë pas një konflikti me njëri-tjetrin. Të dy kishin lënë të takoheshin në lokalin e Ademajt për të sqaruar një konflikt që nuk kishte lidhje me çështje politike, por me ato familjare.
Ngjarja e rëndë u regjistrua rreth orës 20:20, afër Shkollës së Mesme “Ali Hadri”. Gjatë sqarimit të konfliktit, të dy politikanët qëlluan drejt njëri-tjetrit me armë zjarri dhe mbetën të vdekur.
Nga ngjarja mbeti i plagosur edhe vëllai i Astrit Ademajt, Avniu, i cili sipas mjekut kujdestar në spitalin e Pejës, është jashtë rrezikut për jetën.
