Policia Kufitare e Durrësit ka sekuestruar 10 kg lëndë narkotike të llojit heroinë, ndërsa sipas informacioneve të para mësohet se sasia e drogës kishte si destinacion Italinë.
Heroina ishte e fshehur në një kamion me targa “AA 943 OO”, ndërsa qyteti italian ku do dorëzohej droga, ishte Ancona. Ndërkohë drejtuesi i kamionit është ndaluar nga Policia Kufitare, ndërkohë po vijojnë hetimet për zbardhjen e personave të tjerë, që mund të jenë pjesë e kësaj skeme të trafikut të drogës nga Shqipëria në drejtim të Italisë.
Lënda narkotike ishte fshehur në kabinën e automjetit. Kamioni kishte ngarkuar konfeksione, ndërsa policia kishte informacione për lëndën narkotike që po trafikohej duke e kontrolluar imtësisht. Drejtuesi i kamionit , Bujar Shazivari, 63 vjeç nga Durrësi u arrestua nga policia.
Sekuestrimi i lëndës narkotike vjen menjëherë pas vizitës së Kryeprokurores së Përkohshme Arta Marku, e cila bëri apel që Porti i Durrësit të jetë objekt kontrolli. Ajo deklaroi se kjo është e vetmja mundësi për të goditur grupet dhe bandat e trafikut të drogës nga Shqipëria në drejtim të Italisë.
Njoftimi i Policisë së Shtetit
Port-Durrës.Policia Kufitare e Portit Durrës godet një tjetër tentativë të trafikut ndërkombëtar të drogave të forta.Sekuestrohen rreth 11 kilogramë lëndë narkotike e dyshuar Heroinë.
Arrestohet në flagrancë poseduesi i lëndës narkotike.Gjetja e lëndës narkotike gjatë kontrollit në vijë të dytë nga Policia Kufitare.Kontrolli i imtësishëm mbi bazën e informacioneve të Policisë Kufitare në bashkëpunim me DVP.Durrës dhe agjensitë e tjera ligjzbatuese.
Me datë 11.02.2018, shërbimet e Policisë Kufitare të Portit Durrës, në vijim të kontrrolleve intensive për parandalimin dhe goditjen e trafikut të lëndëve narkotike, si dhe bazuar në informacionet e marra në rrugë operative në bashkëpunim me agjensitë e tjera ligjzbatuese gjatë kontrollit në vijën e dytë të kamionave rezultoi se:
Në kabinën e kamionit “MAN”, me targë AA 943 OO nën krevatin e shoferit në një vend të fshehtë pas kontrollit të imtësishëm me qenin antidrogë dhe fibroskop u gjetën disa pako me lëndë të dyshuar Heroinë.
Kamioni drejtohej nga shtetasi Bujar Shazivari, 63 vjeç, banues në Durrës.Në vendngjarje ka mbërritur grupi hetimor dhe specialistët e Sektorit të Hetimit të Narkotikëve në Drejtorinë Vendore të Policisë Durrës.
Nga kontrolli i imtësishëm u gjetën 10 pako të mëdha dhe një pako e vogël ku brenda tyre kishte lëndë narkotike të dyshuar Heroinë, ku është sekuestruar në cilësinë e provës materiale ku do kryhet dhe peshimi i plotë i saj.
Kamioni me ngarkesë 15 koli me qese plasmasi me destinacion Firenzze-Itali.Grupi hetimor po vijon punën për zbardhjen e plotë të kësaj ngjarje, identifikimin dhe kapjen e personave të tjerë të përfshirë në këtë trafik.Njëkohësisht është shkëmbyer informacion në kohë reale me homologët Italianë për të zhvilluar hetime të përbashkëta në lidhje me këtë rast.
