Durrësi është një nga zonat më tepër të prekura nga tërmeti i mëngjesit të djeshëm. Ende është duke u punuar nga forcat operacionale për kërkim-shpëtimin e personave që vazhdojnë të jenë në rrënoja. Por, qyteti duket i qetë, ku mbizotërojnë banesat e rrënuara, njerëz që qëndrojnë jashtë. Nga frika e vazhdueshme për pas goditjet, por edhe pse për shumë prej tyre shtëpitë tashmë janë të rrezikshme për të qëndruar.
Ndaj edhe kanë zgjedhur si shumë në Tiranë, të kalojnë natën jashtë e në makinë. Një ditë pas tërmetit fatkeq Durrësi është zgjuar i gjunjëzuar, si e gjithë Shqipëria. Në rrugë ka inerte të lëna pas goditjeve fatale dhe në shumë prej tyre është vendosur shiriti nga policia për të mos kaluar. Pasi vazhdon të jetë zonë me rrezikshmëri të lartë.
“DurrësLajm” ka shkrepur këto foto nga disa zona të qytetit, që fatkeqësisht duket sikur ka kaluar një gjendje “lufte”.
Data 27 nëntor është shpallur ditë zie, ndërsa në Durrës dhe Tiranë qeveria shpalli gjendjen e jashtëzakonshme. Nga të dhënat e tanishme mësohet se fatkeqësisht kanë humbur jetën 31 viktima dhe janë lënduar 658 persona.
