Juristi Kreshnik Spahiu, i është rikthyer lajmit të shpalljes “non-grata” të Sali Berishës dhe familjes së tij nga ana e SHBA-së. Ai paralajmëron të tjera fakte nga SHBA-ja, ku sipas tij, pas dy muajsh Berishës do ti publikohet dosja.
Me anë të një statusi në rrjetin social Facebook, ai shkruan se vendimi për shpalljen “non grata” të familjes Berisha, është marrë në muajin dhjetor të vitit 2018 nga qeveria Republikante e Donald Trump.
Sekretari Amerikan, Antony Blinken, informoi dje se kishte firmosur shpalljen “non grata” të Berishës dhe të familjes së tij.
“Aktet korruptive të ish-presidentit shqiptar Sali Berisha minojnë demokracinë në Shqipëri. Prandaj unë në mënyrë publike shpall Berishën dhe anëtarët e familjes së tij të ngushtë si të papërshtatshëm për të hyrë në SHBA. Ne qëndrojmë të bashkuar kundra korrupsionit me partnerët tanë në Shqipëri”, shprehej Blinken.
Më pas DASH nxori një deklaratë për shtyp, ku informoi se arsyeja e shpalljes së Berishës “non grata”, lidhet jo vetëm me pasurimin përmes pushtetit, po ndërhyn në proceset e drejtësisë për t’i shpëtuar ata nga ndëshkimi.
