Deputetja e zgjedhur e Partisë Demokratike në Kavajë, Grida Duma deklaroi se kryedemokrati Lulzim Basha, ka pasur oferta nga grupe kriminale në këmbim të pushtetit, por ai ka refuzuar.
E ftuar në emisionin “Çim Peka Live”, Duma tha se Basha ka vendosur Shqipërinë para pushtetit duke refuzuar këto oferta dhe se sipas saj, është treguar burrë shteti.
Ndër të tjera, Grida është shprehur se këtë refuzim, ajo e ka parë si provë force për të vënë Shqipërinë, para marrjes së pushtetit.
Grida Duma: ”E kam parë në vitin 2013, kur kisha vetëm një vit e pak që isha bërë pjesë e kabinetit të zotit Berisha. E kam parë me sytë e mi atmosferën, se çfarë do të thotë kur një burri shteti i vjen oferta për të marrë peng biznesin, administratën për të përfshirë krimin, por që e refuzoi. Edhe sot, Basha e ka pasur këtë mundësi. Të vijë në pushtet përmes bandave, ka pasur oferta. Nëse ka një pikë pozitive që duhet që Partia Demokratike të jetë krenare, është që ka një kryetar që nuk bashkëpunon me bandat për të ardhur në pushtet. Nuk ka pasur pamundësi Lulzim Basha për të ardhur me pahir? Ka pasur, e ka refuzuar. E shikoj si një provë forcë për të mos sakrifikuar Shqipërinë për pushtetin.”
Partia Demokratike ka vendosur të hapë garën për kreun e ri të saj dhe zhvillimin e votimit sipas parimit një anëtar një votë, në 13 qershor.
Vendimi i marrë mbrëmjen e së dielës nga kryesia, afron me pak më shumë se një muaj, këtë proces, i cili sipas statutit do të duhej të zhvillohej në muajin korrik.
