Kreu i Partisë Agrare Ambientaliste, Agron Duka ka folur për mediat pas mbledhjes me kreun e PD-së.
Ashtu si Nard Ndoka, edhe kreu i PAA-së, Agron Duka u shpreh qartë se marrëveshja penalizon partitë e vogla, të cilat nuk mund të regjistrohen në koalicion. I pyetur nëse PAA do të kandidojë nën siglën e Partisë Demokratike, Duka tha se fillimisht partia e tij do të masë forcat se sa mandate mund të fitojë, dhe pas shqyrtimit do vendosë.
Gjithashtu, Duka shprehet se është i kënaqur me arritjen e marrëveshjes, ndërsa zbulon se Basha ishte i detyruar të pranonte 25 qershorin si datën e zgjedhjeve parlamentare:
“Të gjithë partitë kanë të drejtë të vendosin vetë nëse mund të hyjnë ose jo me Pd-së. Duhet me mat forcat, kjo marrëveshje i dëmton partitë e vogla, ky kod zgjedhor është bërë për të pasur koalicione, prandaj ne duhet ta masim mirë veten nëse mund të nxjerrim deputetë apo jo.
Në këto kushte ku nuk ka numërues, mund të kemi pretendime në 2 ose 3 qarqe, do shohim nëse mund të konkurrojmë vetë apo jo.
Unë gjykoj në Durrës e marr 1 mandat, nëse ky mandat nuk shoqërohet me të tjerë, atëherë mbetet për t’u parë.
Po shoh mundësinë nëse ne mund të masim forcat nën siglën e PAA-së.
Penalizuese është sa t’dush. Në radhë të parë jam shumë i kënaqur që u arrit marrëveshja, në kushtet që ishim në një greminë ndoshta, unë gjykoj që Basha ishte i detyruar të pranonte datën nga Rama. Më e mira është që të gjitha partitë do marrin pjesë në zgjedhje”, tha Duka.
